Ilir Meta do të niset të dielën në Shtetet e Bashkuara të Amerikës. Një vizitë e shpallur me bujë një muaj më parë nga vendlindja e tij, Skrapari, kur kreu i Kuvendit ua hodhi në sy kritikëve të tij një axhendë diplomatike për të treguar që nuk është i izoluar nga Uashingtoni.
Megjithatë, deri tani ende stafi i Metës nuk ka shpërndarë një axhendë zyrtare të turit amerikan. Siç mësohet, bëhet fjalë për një seri takimesh në Uashington, përkatësisht në Kongresin Amerikan me disa kongresmenë edhe senatorë të ndryshëm.
Nuk dihet ende nëse bëhet fjalë për një ftesë nga kreu i Kongresit të SHBA apo zyra e ndonjë anëtari të Dhomës së Përfaqësuesve. Bashkë me Metën, të dielën do të udhëtojë dhe gazetari Robert Papa, i cili jeton në SHBA dhe ka zhvilluar disa kontake për të mundësuar takimet.
Papa bëri të ditur se axhenda e kreut të Kuvendit është e përqëndruar në Uashington, pra në kryeqytetin e SHBA dhe jo në Nju Jork, ku ndodhet një pjesë e madhe e diasporës shqiptare.
Nuk përjashtohet dhe ndonjë udhëtim në Detroit ku ndodhet dhe një pjesë e emigrantëve të zonës juglindore të vendit, kryesisht Leskovik dhe Skrapar.
Mundet që deri të dielën pritet të sqarohen detaje të tjera rreth kësaj vizite ende të pazbardhur, veç faktit që në të, një rol qoftë dhe periferik, e ka dhe Robert Papa. /tesheshi.com/
