Kreu i shtetit Meta u gjend mes njerëzve që duan ta nxjerrin nga Presidenca, e kjo për shkak të një rrethane, edhe politike: Përkujtimit të Konferencës së Pezës. Aty, Meta qe mes figuarave më të larta të mazhorancës, me të cilën është në një përplasje të ashpër, e që një ditë më parë madje bëri dhe thirrje për rrëzimin e saj, ndonëse është i zgjedhur nga ajo mazhorancë si president i vendit.
Në fjalën e tij, Meta bëri një lidhje mes kredos së asaj konference, ku edhe pse ideologjikisht është e tëra komunizëm, presidenti e quajti të shenjtë atë, e për më tepër si një prolog i integrimit në BE.
“Vijmë të përkulemi me nderim në këtë vend të shenjtë për të gjithë shqiptarët sepse Peza për shqiptarët do të thotë bashkim, qëndresë, dhe besa-besë me parullën historike që lindi këtu dhe që nuk mund të mbetet vetëm histori, por që është edhe një amanet që gjithë shqiptarët: të bashkohen pa dallim feje, krahine dhe ideje për interesin kombëtar”, tha Meta, duke vijuar:
“Peza nuk është mund të mbetet vetëm histori, por është amaneti i gjithë dëshmorëve që dhanë jetën për të realizuar vendimin madhor të Konferencës së Pezës për bashkimin e shqiptarëve për çlirimin e Shqipërisë. Sot objektivi ynë kombëtar është integrimi i Shqipërisë, ndaj është koha për të mos e vonuar më këtë proces për shkak të antagonizmit politik të paprinciptë, por është koha për të forcuar bashkëpunimin duke lënë mënjanë interesat afatshkurtra të ngushta në mënyrë që e ardhmja evropiane e Shqipërisë të jetë sa më e shpejtë, sa më e prekshmë për fëmijët tanë”, tha Meta. /tesheshi.com/
