Presidenti Meta ka përcjellë shqetësimin e tij, ndonëse në mënyrë sfiduese e me buzëqeshje, se ardhja e koronavirusit në Shqipëri mund t’i prish planin e 15 marsit, ku ai, ndër të tjera, ka paralajmëruar se “me popullin” mund t’i mësyjë parlamentit për ta shpërndarë, gjithnjë nëse qeverie nuk i bindet dekretit të tij kundër një ligji që i heq atij të drejtën të pranojë betimet e drejtuesve të institucioneve të reja të drejtësisë.
Nisur nga përvoja e hidhur e dhjetorit, ku tërmeti i 26 nëntorit e bëri të anullojë një tubim të thirrur më 8 dhjetor, ahere me kauzën e referendumit, kreu i shtetit, i shndërruar tashmë në një aktor politik opozitar me kostum presidenti, paralajmëron me anë të një statusi se “pranvera nuk mund të ndalet”, duke nënkuptuar me këtë “pranverën” e tij, atë kuqezi, një “vjedhje autorësie” nga Kreshnik Spahiu i Aleancës Kuqezi, me kuazën e tij të para pak viteve.
“Lulet po shtohen! Pranvera nuk ndalet!”, shkruan Meta, duke pozuar, siç e ka bërë zakon që para një viti, me kokën e ndërfytur në një degë peme me lule pranverore.
