Presidenti Meta ka ofruar si “porcion mëngjesi” mesazhin se Shqipëria (ai) dhe Amerika, janë në një aleancë të pathyeshme. Për këtë ka shfrytëzuar një protestë të një grupi shqiptarësh para Shtëpisë së Bardhë, ku ndër të tjera u sulmua dhe Soros, duke e shndërruar kështu në kauzë politike idenë se miliarderi hungarezo-amerikan ka gisht në Reformën në Drejtësi. Ndërkohë, kjo e fundit ka për gardian pikërisht administratën amerikane, edhe nën Trump.
“Mirënjohje të gjithë shqiptarëve të mbledhur dje në Uashington DC para Shtëpisë së Bardhë, të cilët lanë punët e tyre dhe i bashkoi shqetësimi për të ardhmen e Shqipërisë, duke konfirmuar aleancën e pathyeshme të kombit tonë me Shtetet e Bashkuara të Amerikës.
Përkrahja e tyre më shumëfishoi forcat, ndaj si President i Republikës kam besim tek komuniteti i ndershëm shqiptaro-amerikan, për të mbrojtur dhe forcuar së bashku këtë aleancë strategjike! Shqiptarët qëndrojnë të fortë dhe të vendosur, jo për të marrë një vizë amerikane, por për të mbrojtur idealet amerikane të lirisë dhe dinjitetit njerëzor, që janë jo vetëm idealet e SHBA, por edhe të qytetërimit botëror ku ne bëjmë pjesë. Shqipëria nuk do të kthehet kurrë më në ‘one-party state’! Ne jemi anëtarë të NATO-s dhe në zemër të kësaj Aleance është DEMOKRACIA!
Zoti e bekoftë Shqipërinë!
God bless America!
God bless Albanian-American friendship”, shkruan pikërisht Presidenti i Republikës, duke luajtur kështu hapur rolin e një lideri opozitar me pozicionim të qartë kundër qeverisë. /tesheshi.com/
