Në një dalje për media, presidenti Meta e përligji letrën dërguar në Bruksel, atë të komentuarën si penguese për negociatat, si një raportim mbi atë çfarë po ndodh me Gjykatën Kushtetuese
“Jo vetëm dje por edhe sot pas rrjedhjes nga qeveria ku bëhej publike letra drejtuar Komisionerit të Zgjerimit gjoja sikur ishte kundër çeljes së negociatave jam i detyruar për të bërë dhe një herë të qartë letrën që kisha dërguar, jo për publikun po për Komisionin europian për të qenë më të vëmendshëm për ato çfarë po ndodhin, aty flitet për procedurën në Gjykatën Kushtetuese dhe ngërçet që janë krijuar”, tha Meta.
Sa i përket paralajmërimit se më 15 mars do i mësyjë parlamentit dhe do e shpërndajë atë, gjithnjë nëse mazhoranca nuk tërhiqet pas një ligji të kthyer me dekret mbi betimin e të emëruarve në gjykata, Meta thjesht iu referuar asaj që e quajti “uragan kuqezi”, sipas tij, populli që iu bashkua me 2 mars.
Nga ana tjetër, kryeparlamenti Ruçi e ftoi në parlament, gjysëm me gjuhë zyrtare e gjysëm ironike
“Secili institucion është legjitim në vendimet që merr, edhe presidenti në dekretet që miraton ose kthen. I tillë është edhe me dy dekretet e fundit, që Kuvendi do t’i shqyrtojë me kujdes, brenda afateve. Mirëpres Presidentin sa herë që ai dëshiron të vizitojë parlamentin. Ose do të mirëprisja apo lexoja çdo mesazh që ai do t’i drejtonte me shkrim parlamentit”, tha Ruçi. /tesheshi.com/
