LSI mbështet Adriatik Llallën në kërkesën për të larguar deputetin e kësaj partie të Vlorës, Shkëlqim Selami.
Pa u vonuar aspak nga qëndrimi i Prokurorisë së Përgjithshme, në një deklaratë të beftë, zv/kryetari i Lëvizjes Socialiste për Integrim, Petrit Vasili, ka deklamuar me entuziazëm se partia e Ilir Metës e mbështet zbatimin e plotë të ligjit të dekriminalizimit.
“Mbështetje të plotë zbatimit të dekriminalizimit. Dekriminalizimi i plotë garanci për reformën në drejtësi dhe bazë për zgjedhje të lira dhe të ndershme. Dekriminalizimi standard i panegociueshëm për LSI-në”, tha Vasili.
Parimore kjo mbështetje?! Në fakt ka zëra shumë të fortë që Shkëlqim Selami është ndarë nga Meta prej kohësh dhe në korrik i ka deklaruar atij se nuk do të votonte rrëzimin e Edi Ramës si kryeministër.
Jo më kot, në fundjavën e shkuar, Selami ishte i vetmi deputet i Vlorës me Edi Ramës në qytetin bregdetar duke inspektuar pedonalen. /tesheshi.com/
