Kreu i LSI-së Ilir Meta u shpreh se është në favor të një hetimi ndërkombëtar për skandalin e CEZ dhe akuzat e PD-së që e lidhin atë me këtë skandal. Ish-kryeministri Berisha bëri thirrje nga parlamenti që akuzat të hetohen ndërkombëtarisht dhe duket se ka gjetur consensus edhe nga Meta që është vënë në qendër të sulmeve të opozitës.
Meta ka hedhur edhe hapin e parë në këtë drejtim, pasi ftoi krerët e partive parlamentare t’i kërkojnë asistencë Shteteve të Bashkuara të Amerikës.
“ Dua të mbështes fuqimisht idenë e një hetimi të shpejtë, të plotë dhe të thellë ndërkombëtar për të gjithë çështjen e CEZ, që nga dita e parë e aktivitetit në vendin tonë dhe deri më sot. I ftoj krerët e partive parlamentare t’i kërkojmë SHBA të jenë të angazhuara dhe të krijojë juridiksion të veçantë, prokurorëve amerikanë për të ndihmuar në zbardhjen e kësaj çështje, e cila pretendohet që i ka kushtuar disa qindra milionë euro qytetarëve shqiptarë dhe ku janë përmendur, akuzuar mjaft figura politike, dhe qeveritare dhe jam i sigurtë dhe besoj se jo vetëm zoti Berisha po gjithë të tjerët do i bashkohen kësaj kërkese konkrete. Nëse janë të gatshëm të kontribuojnë për dekriminalizmiin dhe luftën kundër korrupsionit”, deklaroi Meta.
Kreu i Kuvendit duke folur në emër të LSI-së tha se kjo parti do kërkojë përfshirjen e prokurorëve amerikanë, në rastet kur akuzat bien mbi politikanë të nivelit të lartë për lidhje me krimin e organizuar apo për korrupsion. /tesheshi.com/
