Presidenti Meta, në një vazhdë të re beteje me mazhorancën, duke aluduar se kjo e fundit po bën “grusht shteti” ndaj Kushtetutës, e me pretendimin se ai është shndërruar në “kështjellë” për mbrojten e saj, njëherësh me përbetimin për ta “shpartalluar”, e nisi ditën me një mesazh ftues, ngjashëm si ato për të votuar me 13 tetor, që t’i bashkohen atij me 2 mars, siç shprehet, për një “besëlidhje të re”, ku lihet e nënkuptaur se ajo e vjetra është e Skënderbeut kunër osmanëve qindra vite më parë në të njëjtën datë.
“Të dashur qytetarë të Republikës së Shqipërisë!
Agresioni pushtues i Rilindjes ndaj të gjithë institucioneve të pavarura në vend është një realitet i hidhur që secili prej jush e ndjen çdo ditë. Por kokëfortësia e saj për të pushtuar me çdo çmim dhe në mënyrë jo vetëm antikushtetuese por edhe mafioze Gjykatën Kushtetuese përbën qartë një grusht shteti, me qëllim instalimin e një diktature të pakicës që ka tmerr nga liria e popullit shqiptar dhe kërkon të zhdukë çdo mundësi demokratike për ndryshim dhe llogaridhënie.
Ndaj ju ftoj të gjithëve në 2 Mars, në Bulevardin “Dëshmorët e Kombit” t’i japim paralajmërimin e fundit kësaj bande që nuk ka ditë që nuk përdhunon Kushtetutën dhe ligjet e vendit”, shkruan Meta, si nisja e një përpjekje për sfidën e vështirë të të mbledhurit të njerëzve në shesh.
Nën këtë frymë, ai flet dhe për mafia ndërkombëtare, që sipas tij “po na rrëmben rininë e mrekullueshme”.
“Nuk ka forcë në botë t’i kthejë shqiptarët 30 vite pas për të zbrazur Shqipërinë nga rinia jonë e mrekullueshme dhe për t’ia dorëzuar mafies ndërkombëtare të ardhmen e Atdheut tonë.
Ndaj në 2 Mars të bëjmë një Besëlidhje të Re për t’ia kthyer sovranitetin e humbur popullit shqiptar dhe rivendosur demokracinë, llogaridhënien dhe sundimin e Kushtetutës”, shkruan njeriu që drejton shtetin. /tesheshi.com/
