Kreu i Lëvizjes Socialiste për Integrim, Ilir Meta ka folur sot për reformën në drejtësi, një ditë pas miratimit të opsionit përfundimtar të Komisionit të Venecias. Meta siguroi se 20 anëtarët e LSI-së do të votojnë në mbështetje të standardeve që u miratuan nga Komisioni i Venecias, ndërsa shtoi se në rast paqartësish do t’i drejtohen ekspertëve të EURALIUS-it dhe OPDAT-it.
“Të 20 votat e LSI-së do të jenë në mbështetje të standardeve që ka rekomanduar Komisioni i Venecias. Ku ka paqartësi, votat tona do të jenë në mbështetje të rekomandimeve që do të bëjë OPDAT-i dhe EURALIUS-i”, – u shpreh Meta.
Më herët ai deklaroi se konsensusi më i mirë është referimi i përbashkët ndaj rekomandimeve të komisionit të Venecias. “Është me rëndësi që kur komisioneri Hahn të jetë në Tiranë në fund të marsit, të kemi një tekst përfundimtar të dakordësuar. Ky do të ishte një mesazh shumë i përgjegjshëm i të gjitha forcave tona parlamentare dhe jashtë parlamentare, duke treguar se ne kemi vullnetin për të ecur me shpejtësinë e duhur dhe në mënyrën e duhur për hapin e mëtejshëm: hapjen e negociatave”, – deklaroi kreu i LSI-së. /tesheshi.com/
