Presidenti Meta vizitoi atë që mund të quhet “ekspozita e opozitës”, një paraqitje punimesh nga Astrit Delvina, një ndër mbrojtësit e kauzës së teatrit, i cili me një cikël sarkastik të quajtur “Notre Dame de Tiran”, prezantuar në ambientet e Teatrit Kombëtar, ka tentuat të godasë pushtetin me penel, duke patur si bazë pikërisht kauzën e teatrit.
E pas vizitës aty të dy krerëve të PD-së, Berishës e Bashës, i treti pas tyre ka qenë Meta, duke e plotësuar treshen opozitare ndaj Ramës. Për këtë, shërbyen dhe mesazhet e kreut të shtetit gjatë vizitës në ekspozitë, ku në njërin prej tyre prodhoi dhe një lapsus, pasi quajti si “kauzë” ndërtimin e teatrit të ri e jo atë që është në të vërtetë, mbrojtjen e të vjetrit.
“Shqetësimet që sjell Delvina janë mjaft të mirëpritura. Delvina është shembull i artistit që nuk pranon të nxjerrë në treg vlerat e tij artistike për të mbyllur sytë para kauzave që shkatërrojnë vendin”, tha Meta. /tesheshi.com/
