Kryetari i Kuvendit, Ilir Meta zgjodhi 29 Nëntorin për të komentuar vlerësimet e fundit të Europës për çeljen e negociatave drejtë BE-së. ai tha se ky nëntor e gjeti vendin një hap më pranë Europës, ndërsa sipas tij kjo arritje është nderimi i gjakut të të rënëve për çlirimin e vendit.
“Është kënaqësi që të ritakohemi këtë 29 Nëntor dhe akoma më kënaqësi të vëmë re se në një vit vendi është edhe më i integruar në Evropën e Bashkuar, në themel të së cilës qëndrojnë vlerat antifashiste të popujve të cilët luftuan për lirinë e vendit të tyre, por edhe për lirinë e mbarë Evropës. Ndaj jemi sot për të nderuar edhe një herë kujtimin e të gjithë atyre që sakrifikuan gjithçka, që dhanë jetën e tyre, që dhanë rininë e tyre, për një Shqipëri të lirë, për një Shqipëri demokratike dhe për një Shqipëri evropiane”, – theksoi Meta.
Në vijim të fjalës së tij, ai vuri theksin tek proçesi integrues i vendit në Bashkimin Evropian ku shprehu bindjen se anëtarësimi i vendit në BE plotëson edhe idealin e veteranëve dhe dëshmorëve të atdheut.
“Rekomandimi pozitiv i Komisionit Evropian, pas një vlerësimi pozitiv për reformat e ndërmarra në vend për çeljen e negociatave sa më parë të jetë e mundur për anëtarësim, është një tregues i këtij progresi dhe unë jam I bindur se duke vazhduar me këtë rrugë ne e plotësojmë edhe më tej idealin e tyre për Shqipërinë që ëndërruam. Ndaj i përjetshëm kujtimi i heronjve dhe i dëshmorëve të atdheut, jetë të gjatë veteranëve tanë të dashur”, – tha Ilir Meta në fjalën e tij. Kryetari i Kuvendit mori pjesë në homazhet e zhvilluara me rastin e 72-vjetorit të Çlirimit të Shqipërisë në Varrezat e Dëshmorëve. Ai vendosi një kurorë me lule pranë monumentit “Nënë Shqipëri” në nderim të kujtimit të dëshmorëve që dhanë jetën për çlirimin e atdheut. /tesheshi.com/
