Duke komentuar marrëveshjen mbi Zgjedhoren, presidenti Meta kujtoi kohën kur ai u fut në grevë urie në parlament, për të kundërshtuar paktin Rama – Berisha mbi ndryshimet kushtetuese e në kodin zgjedhor, atë që kontestohet sot.
“Kjo marrëveshje e sforcuar (e Zgjedhores) duhej të ishte bërë prej kohësh, që mund të kishte bërë progres thelbësor në shumë aspekte dhe të jepte një dimension tjetër të sistemit politik në vend. Të mos harrojmë që në 2008 unë dhe disa deputetë bëmë grevë urie që të mos mbylleshin listat dhe të mos bëheshin ndryshime kushtetuese që cenuan parimin e balancës dhe kontrollit në vend, por të gjitha këto nuk janë aq të rëndësishme përpara legjitimitetit qoftë dhe sa më bazik të gjithë institucioneve në Kuvend, duke nisur nga Kuvendi”, tha Meta në një dalje për shtyp.
Ai gjithashtu shpotiti të ashtuquajturin Këshill Politik.
“Kemi disa probleme kaq imediate në mënyrë që të mos kemi më këshilla politikë si këshilla popullorë përpara çlirimit. Të kemi vetëm një parlament, ku politika dialogu dhe konsensusi bëhet në parlament”, theksoi kreu i shtetit. /tesheshi.com/
