Ilir Meta, tashmë president i zgjedhur por ende i pahyrë në zyrën e kreut të shtetit, është kthyer në Skraparin e tij për të çelur sezonin turistik të atyshëm.
Turizëm në Skraparin e harruar? Po! Sipas Metës, kjo zonë i ka të gjitha resurset për të thithur kontigjente vizitorësh të huaj.
“Skrapari ka bukuri pafund dhe unë besoj që ato do të kthehen në një shans dhe në një mundësi për të gjithë banorët e kësaj zone për të jetuar më mirë dhe për të siguruar një të ardhme shumë më të mirë”, u shpreh Meta.
Siç dihet, ndër më të njohurat dhe më të vizituarat janë kanionet e Skraparit, por vetë Skrapari ose Çorodova si kryeqendër e zonës, janë në nivele të mjerueshme izolimi dhe harrimi.
Por Meta u shpreh se investimet që po kryen do të bëjnë të mundur rritjen e numrit të turistëve si edhe rritjen e mirëqenies së banorëve të Skraparit, ku veçoi fillimin e ndërtimit të rrugës Përmet-Skrapar.
“Kjo është një rrugë mjaft e rëndësishme dhe një shpresë mjaft e madhe për zhvillimin e gjithë zonës dhe do të bëj të mundur lidhjen e luginës së Osumit me luginën e Vjosës, si edhe lidhjen e Beratit me Gjirokastrën nëpërmjet Skraparit dhe Përmetit”, tha Meta, në pozitën e birit të zonës. /tesheshi.com/
