Sapo Edi Rama vuri këmbën në avionin që e dërgoi në SHBA për një vizitë të rëndësishme diplomatike, ku pritet të ketë takime në Shtëpinë e Bardhë, disa qarqe në Tiranë shpërthyen me sulmet dhe tezat e reja politike.
Një nga ato që po qarkullon në media dhe po shpërndahet në rrjete sociale nga mbështetës të LSI-së është teza e “Metës-Kryeministër”, pasi të largohet nga qeveria që drejtohet nga Edi Rama.
Skenari është përgatitur i tëri: “me ikjen e Ramës edhe Basha do të binte dakord për një qeveri të përbashkët me LSI-në”. Dhe fillimisht githçka ka ardhur nga qarqe që kanë afërsi me PD-në apo ish-qeveritarë të PD-së.
Ka dy ditë që po depërton në një mori portalesh rikthimi i Ilir Metës si kundërshtari i Edi Ramës, duke lidhur një aleancë me Bashën, Ben Blushin, Kreshnik Spahiun, Paskal Milo e të tjerë.
Dhe si për të përforcuar më shumë këto fjalë që po qarkullojnë si reaksion zinxhir, kreu i grupit parlamentar të LSI-së, Petrit Vasili, me anë të një letre zyrtare por që e shpërndau në të gjitha mediat, akuzoi kryeministrin Edi Rama dhe ministrin e Financave, Arben Ahmetaj se nuk po reflekton për një çështje që është ngritur nga Vasili për çështjet e fermerëve.
Dhe e gjitha kjo bëhet në një kohë kur LSI-ja jo vetëm ka ministrin e Bujqësisë, por e kontrollon totalisht këtë sektor.
Megjithatë, koha e zgjedhur për tezën e “rikthimit të Metës në Qeveri”, bëhet pikërisht kur Edi Rama ndodhet në Shtetet e Bashkuara të Amerikës dhe pritet që të vijë me një mesazh shumë të fuqishëm nga Shtëpia e Bardhë për reformën në drejtësi dhe arrestimin e politikanëve të korruptuar.
Një ofensivë e LSI-së në këtë moment, ka dy arsye: ose është presion ndaj Ramës ose është mesazh për të bërë të ditur se besnikëria me PS-në tashmë ka mbaruar.
Madje disa media bënin të ditur se Kreu i LSI-së do të marrë me vete në koalicion edhe Gjergj Bojaxhiun me mbështetësit e tij të shumtë në Tiranë, Kreshnik Spahiun e zhurmshëm dhe Ben Blushin që mund t\i heqë një copë PS-je Ramës.
Nëse kjo tezë shërben për të paralajmëruar kreun e PS-së, është se duhet të bëjë diçka atje në SHBA që mund t’i prishë punë LSI-së dhe Ilir Metës.
Dhe në fakt, sa herë ka vizita të tilla kaq të rëndësishme, shpesh LSI-ja del me një tezë zhurmuese.
Kur në Uashington ndodhej Lulzim Basha, në media doli u riaktivizua Berisha që sulmoi Ramën që po bënte gati arrestimet e aleatëve të tij.
E gjitha bëhet për të shmangur një aleancë fluide në Kuvend ndërmjet PD-së, PS-së por edhe deputetëve pa përkatësi që të miratonin reformën në drejtësi. Sinjale siç duket ka, ndaj dhe ka nisur zhurma.
/tesheshi.com/
