Kryetari i Lëvizjes Socialist për Integrim, Ilir Meta ka ngritur disa çeshtjes, gjatë çeljes së Konventës Kombëtare të kësaj force politike, por ajo që theksoi më tepër, ishte e ardhmja e shumëpërfolur e koalicionit qeverisës PS-LSI. Meta e cilësoi “bashkëjetesën” me PS-në si racionale, por që në këndvështrimin e tij, duhet të bëhen më shumë përpjekje për të gjetur gjuhën e përbashkët dhe për të shmangur tensionet mes tyre, të shkaktuara nga Partia Socialiste.
“Ne i kemi qëndruar besnik koalicionit me PS, duke pasur si busull interesat, të drejtat dhe detyrimet ndaj qytetarëve të vendit me orientim të qartë evropian, por duhet të ketë përpjekje të vazhdueshme për të dëgjuar njëri-tjetrin, mësuar, respektuar dhe gjetur gjuhën e përbashkët, pasi politikat e njëanshme, të nxituara prodhojnë tensione të panevojshëm, jo vetëm brenda koalicionit, por edhe me aleatët. Koalicioni ynë ka potencial të lartë, por të pashfrytëzuar ende për sinergjinë në plotësimin e premtimeve zgjedhore dhe sfidave. Në asnjë rast nuk ka vend për vetëkënaqësi nga marrëveshja rrjedh edhe detyrimi i konsensualiteit parim që në të ardhmen duhet forcuar më shumë”, u shpreh Meta, teksa shpalosi programin e tij në konventë, nën moton “Një shans për të gjithë”.
Lideri i LSI-së foli edhe për debatte e fundit mes Athinës zyrtare dhe palës shqiptare, ndërsa apeloi për uljen e “gjakrave” dhe zbutjen e toneve në të mirë të dy vendeve fqinje.
“Asnjë çështje e trashëguar nuk duhet të cënojë këtë miqësi dhe intersat e dy vendeve. Ndaj çdo retorikë demonizuese nga Athina apo Tirana nuk i shërben marrëdhënieve mes Greqisë e Shqipërisë dhe LSI distancohet nga kjo retorikë. Ne do të mbështetemi te përkrahja e Greqisë në rrugën tonë drejt BE në realizimin e shumë reformave institucionale dhe zhvillimin ekonomik, ura bashkëpunimi me Greqinë, duke u mbështetur jo vetëm në miqësinë shekullore mes popujve, por edhe lidhjet e pafundme njerëzore e familjare të krijuara në 26 vjet. LSI beson se interesat tona duhet të prevalojnë mbi plagët e trashëguara nga e kaluara vetëm mes bashkëpunimit dhe mirëkuptimit reciprok në vijimësi, ne do të investohemi në adresimin objektiv të shqetësimeve dhe pretendimeve duke respektuar të drejtat por edhe duke nxitur rrugën tonë konstruktive për zgjidhjen e shqetësimeve tona si heqja e ligjit absurd të luftës dhe respektimi i popullsisë came sipas të drejtës ndërkombëtare”, theksoi ai.
Meta apeloi mazhornacën dhe opozitën për një bashkëpunim më të frytshëm për të luftuar krimin e organizuar dhe trafikun e kultivimit të kanabisit.
“Nëse mbjellim kanabis sot, nesër do të korrim krimin e organizuar në të gjithë institucionet e shtetit që do të kthehet në bumerang për të ardhmen e vendit tonë dhe të fëmijëve tanë. Ndaj nuk është koha për të çuar në stratosferë kush e ka fajin. Kanabisi nuk është një fenomen i ri, por është padiskutim mjaft shqetësues për të cilin duhet konsensus i gjerë pozitë opozitë dhe gjithë shoqërisë për ta luftuar me sukses. Ndaj politika pa vonesë duhet të realizojë një pakt pozitë opozitë, ashtu sikurse e realizoi për reformën në drejtësi, për ti dhënë fund këtij fenomeni i cili po dëmton imazhin ndërkombëtar të vendit për fat të keq gjithashtu”, u shpreh Meta.
Një tjetër çeshtje aktuale që shqetëson shoqërinë shqiptare sot, është edhe ligji i mbetjeve. Sipas kreut të LSI-së, duhet më shumë konsensus me shoqërinë civile dhe reflektim i thellë për disa shqetësime të drejta të saj./tesheshi.com/
