Presidenti Meta lëshoi apelin e radhës për mbajtje zgjedhjesh lokale më 13 tetori, sipas një dekretimi që i ka bërë kësaj date, pas çdekretimit të diskutueshëm të 30 qershorit, që të dyja pa asnjë konsensus politik.
“Sigurisht që 13 tetori dhe zgjedhjet vendore nuk besoj se zgjidhin gjithcka, por është një detyrim ligjor dhe kushtetues i pashmangshëm, në radhë të parë për kryeministrin që të heqë dorë nga presionet dhe shantazhet ndaj institucioneve duke penguar zbatimin e dekretit dhe padyshim është përgjegjësi e të gjithë të tjerëve që të bëhen gati për të marrë pjesë në zgjedhje te 13 tetorit”, deklaroi kreu i shtetit nga Durrësi.
Ai tha se për këtë i është drejtuar dhe me një letër OSBE-së, e cila nga ana e saj njohu 30 qershorin.
“Sot kam formalizuar një letër drejtuar sekretarit të përgjithshëm të OSBE-së që vizitoi dje Tiranën por edhe kryetarit të radhës, ministrit të Sllovakisë dhe Presidentit të Asamblesë së OSBE-së, meqë Shqipëria përgatitet për të marrë kryesimin e OSBE-së vitin e ardhshëm për të negociuar me të dyja palët për një arritje të një zgjidhje sa më të shpejtë në ditët që vijnë, pasi nuk kemi kohë, jo vetëm për të parandaluar përshkallëzimin por edhe të padenjë për një vend që duhet të jetë shembull në kryesimin e OSBE-së për funksionimin e institucioneve demokratike”, tha Meta. /tesheshi.com/
