Gjatë vizitës së tij në Shkup, kreu i shtetit shqiptar është përpjekur të mos hapë plagë të vjetra, ose më saktë të reja, ku një vit më parë, ish-kryeministri maqedonas, Nikolla Gruevski, turfullonte kundër “Platformës së Tiranës”, ideuar dhe realizuar nga kryeministri Rama, me faktorin politik shqiptar të Maqedonisë.
Mesazhin e tij të faljes, harresës për çfarë ndodhi, Meta e dha dhe gjatë komentit të cështjes së “emrit”, një ngërç i Maqedonisë në raportet me Greqinë.
“Është e domosdoshme që të ecet drejt tolerancës dhe kompromisit sepse kemi nevojë për zgjidhjen nga e cila fitojnë të gjithë. Është e vështirë të gjendet një zgjidhje, në një debat të së kaluarës ku përfiton vetëm njëra palë dhe tjetra vetëm humbet”, tha Ilir Meta, President i Shqipërisë.
Pavarësisht akuzave për ndërhyrje në punët e brendshme, ku në qendër ishte inati me “Platformën e Tiranës”, Presidenti Meta e tejkaloi këtë gjë dhe ka folur për raportet fqinjësore me Shkupin.
Kreu i shtetit shqiptar ka takuar shefin e opozitës Nikolla Gruevskin dhe presidentin e shtetit maqedonas Gjeorgje Ivanovin që e akuzonin shtetin e tij amë, duke iu përcjellë dhe atyre një mesazh për çwshtjen e brendshme.
“Në radhë të parë opozita është faktor mjaft i respektuar në çdo demokraci. Së dyti, nuk më takon mua të caktoj dhe të ndikoj në zgjedhjen e udhëheqësve të Maqedonisë apo të forcave politike në institucione shtetërore”, u shpreh Ilir Meta.
Presidenti Meta në këtë vizitë të tij, thotë se i gjen shqiptarët në pozitë më të mirë institucionale!
“Kam ardhur të vlerësoj rolin stabilizues të shqiptarëve të Maqedonisë. Sidomos rolin përcaktues dhe avancues për integrimet evropiane dhe në NATO, për këto çështje kaq të rëndësishme. Shqiptaret e Maqedonisë janë një faktor tepër vendimtar dhe i përcaktuar qartë”, tha Meta.
Presidenti Ilir Meta paralajmëroi edhe thellim të bashkëpunimit ekonomik dhe politik mes dy vendeve, e cila pritet të kurorëzohet edhe më një takim të përbashkët mes qeverive të Tiranës dhe Shkupit.
Këtu ai përmendi edhe realizimin e projektit për lidhje më të mirë hekurudhore mes dy shteteve, i cili pritet të jetë në agjendë gjatë takimit të dy qeverive, sepse siç vlerëson ai, potenciali është shumë i madh për lidhje më të mira mes Shqipërisë dhe Maqedonisë.
Miradie Hasani – /tesheshi.com/
