Me një gjuhë tipike opozitari, kreu i shtetit Ilir Meta i ka kushtuar një status lirisë së medias, duke e cilësuar atë si “të përkeqësuar” (nënkupto: nën qeverisjen e Ramës pas vitit 2017, prishjes së koalicionit 4-vjeçar PS-LSI)
“Liria e medias në vendin tonë fatkeqësisht është përkeqësuar ndjeshëm.
Mjedisi dhe kushtet e punës së gazetarëve gjithashtu. Censura dhe autocensura ndihen qartësisht në raportimet e tyre të përditshme. Presionet politike të tejskajshme dhe të shumëllojshme kanë mbyllur emisione televizive dhe kanë larguar nga ekranet figura të spikatura të gazetarisë. Ndërsa panelet e emisioneve politike të mbrëmjes më shumë orientohen nga interesat e oligarkëve dhe PPP-ve, se sa nga interesi publik dhe kombëtar”, shkruan Meta, duke vijuar më tej të thotë se “shumë portale në të zezë e kanë ngritur “Fake Neës” në sistem, duke u vënë në shërbim të shtetit të propagandës. Ndërsa praktikat e ‘kasetave të gatshme’ dhe të transmetimeve me ‘regji qendrore’ po u imponohen gjithmonë e më shpesh televizioneve”.
Ndërkohë, konkret, ai është vetëm në dy raste kur thotë se “ende sot askush nuk i di autorët dhe urdhëruesit e sulmit me armë ndaj banesës së familjarëve të gazetares Klodiana Lala apo rrahjes barbare të gazetarit, Elvi Fundo, edhe pse për këto dy raste pati nisur një hetim shtetëror”. Por ndërkohë, për këtë të fundit aludohet se sulmi i ka ardhur nga pronari i një mediaje që është afër Metës, pasi gazetari në fjalë shkroi për të kaluarën e tij të errët, nën një tjetër emër, atë të lindjes, ndërkohë që sot mban emër të sajuar. /tesheshi.com/
