Një deklaratë e fundit e zëdhënësit të Presidencës shfaq qartë një tension mes kreut të shtetit dhe mazhorancës, pas mosdekretimit të Sandër Lleshit si ministër Rendit.
Aty, mes rreshtash, Meta paralajmëron betejën e radhës me Ramën, ashtu siç dhe ky i fundit e ka paralajmëruar me frazën “nuk mbaron me kaq”, pas emërimit të Lleshit si zv.ministër.
“Presidenti Meta konfirmon përkushtimin e tij maksimal në respekt të Kushtetutës, për të bashkëpunuar me të gjitha institucionet në vend, në interes të stabilitetit, forcimit të institucioneve dhe rritjes të kulturës së bashkëpunimit ndërinstitucional me transparencë dhe konstruktivitet.
Por njëkohësisht, Presidenti i Republikës bën të qartë se nuk do të lejojë asnjë përpjekje sfiduese ndaj autoritetit te institucionit qe përfaqëson si Kryetar i Shtetit, Komandant i Përgjithshëm i Forcave te Armatosura dhe Kryetar i Këshillit të Sigurisë Kombëtare. Presidenti i Republikës ka shprehur gjithmonë gatishmërinë e tij t’i japë shpjegime në mënyrë transparente dhe të përgjegjshme Kuvendit të Republikës së Shqipërisë për të gjitha çështjet që Kuvendi do të shprehë interes.
Presidenti Meta ka bindjen e plotë se koha e drejtimit të shtetit shqiptar me Sekretar të Parë ka përfunduar njëherë e përgjithmonë”, ka qenë deklarata e zëdhënësit të Metës, Tedi Blushi.
Siç mund të nuhatet, në horizont po shfaqet përplasja e radhës Rama – Meta. /tesheshi.com/
