Ilir Meta zgjodhi Kosovën në vizitën e tij të fundit zyrtare si President, duke premtuar, krah homologes Vjosa Osmani, se sapo të lërë detyrën do të bëjë më shumë për Kosovën.
“E vetmja keqardhje që kam është që mund të kisha bërë edhe më shumë në përkrahjen e Kosovës nëse do të kisha më pak probleme të brendshme në vendin tim gjatë këtyre 5 viteve.
Por, ju jap fjalën se nga 25 korriku në mëngjes, do të bëj shumë herë më tepër. Kemi patur marrëdhënie të shkëlqyer me ju dhe të gjithë institucionet e Kosovës dhe do të vijojmë në të ardhmen. Jam i bindur se Presidenti i zgjedhur i Shqipërisë do të vijojë këtë traditë shumë pozitive”, tha Meta në konferencën e përbashkët për shtyp me znj. Osmani.
Presidentja e Kosovës Vjosa Osmani ka vlerësuar rolin e presidentit Ilir Meta për mbrojtjen e interesave të qytetarëve të Kosovës. Në konferencën për shtyp pas takimit me kreun e shtetit shqiptar, Osmani theksoi se ai ka qenë zëri edhe i Kosovës në sfida të rëndësishme.
Kjo e fundit tha se Meta do jetë gjithnjë i mirëpritur në Kosovë.
“Kosova ka qenë dhe do të mbetet shtëpia juaj e dytë prandaj jeni të mirëseradhur. Një muaj më parë shtetet tona nënshkruan 19 marrëveshje. Është më se e nevojshme që ato të zbatohen edhe në praktikë për ta forcuar edhe më shumë bashkëpunimin”. /tesheshi.com/
