Presidenti Meta do të nisë konsultimet me partitë politike për datën e zgjedhjeve të reja parlamentare, ato të 2021-shit.
Për këtë, ai ka ftuar në presidencë kreun e mazhorancës Rama, njeriun të cilit i ka shpallur luftë që kur – për ironi – ky i fundit e zgjodhi në krye të shtetit katër vite më parë, përkundër çdo sensiteti publik, e njëherësh duke e nxjerrë LSI-në e tij jashtë qeverisjes pas 8 vitesh në të, fillimisht në koalicion me PD-në e më pas me PS-në.
“Presidenti i Republikës, Ilir Meta në mbështetje të kompetencave të tij Kushtetuese, neni 90 gërma “gj”, pas hyrjes në fuqi të ndryshimeve konsensuale në Kodin Zgjedhor të miratuara në ligjin nr. 101/2020, si dhe në vijim të traditës së mirë, ka vendosur nisjen e procesit të konsultimeve me partitë politike me qëllim caktimin e datës së zgjedhjeve të ardhshme për Kuvendin e Republikës së Shqipërisë. Për këtë, Presidenti i Republikës fton në takim ditën e premte datë 04.09.2020 ora 11:00 pranë Institucionit të Presidentit të Republikës, Kryetarin e Partisë Socialiste z. Edi Rama dhe/apo persona të tjerë të autorizuar prej tij. Me besim në vlerësimin e këtij procesi të rëndësishëm”, thuhet në një njoftim zyrtar.
Njëherësh, kjo konsultë për datë zgjedhjesh vjen pas një precedent të paparë në 30 vite pluralizëm, siç ishte anullimi i një datë zgjedhjesh nga Meta – 30 qershori – dhe caktim i një tjetër date -13 tetorit, të pashvilluara kurrë – pa asnjë konsultë paraprake. /tesheshi.com/
