Me një gjuhë të ashpër akuzueze ndaj qeverisë, presidenti Meta doli në një tjetër konferencë për shtyp në mbrëmje, siç tha, për të denoncuar një tjetër krim sipas tij, një tjetër shkelje kushtetuese nga ana e mazhorancës.
Ai u fut sërish në labirinthe juridike, të vështira për t’u kapur nga masa e gjerë, kësaj here jo për emërimet në Kushtetuese.
“Ligji për Dividentin është rasti më flagrant si Kuvendi i kapur, si një organizatë mafioze; bashkë me qeverinë e mazhorancën ka dhunuar hapur kushtetutën dhe shumë shpejt do të japin llogari para popullit shqiptar dhe drejtësisë së re që do të vijë. Nuk do të ketë shpëtim për ta. Nenet e Kushtetutës janë dhunuar hapur. Barazia para ligjit, tipar themelor i Kushtetutës sonë, por çfarë bëri ky sekt mafioz?
Rilindja miratoi ligjin për disa ndryshime në ligjin për tatimin mbi të ardhurat e ndryshuara, në dëm të sipërmarrësve të ndershëm. Mavri Kuvendi dhunoi hapur dhe tmerrshëm Kushtetutën e Republikës, shkeli me të dyja këmbët ligjin, duke futur në mënyrë të fshehtë dekretin e presidentit për ta botuar në Fletoren Zyrtare.
Kishin si qëllim rrëzimin e dekretit të Presidentit, pa shumë zë. Mavri Kuvendi shkeli me dy këmbët ligjin, një ndër krimet më të mëdha”, tha Meta, duke paralajmëruar: “Ju bëj me dije se për këtë krim të dëmshëm, do paraqes në SPAK kallëzimin penal për vendosjen para drejtësisë të gjithë autorëve të saj”. /tesheshi.com/
