Presidenti Meta i ka kthyer një tjetër ligj mazhorancës, atë delikatin mbi konçensionet dhe PPP-të, në vazhdën e refuzimit për të dekretuar shumë ligje të ardhura nga qeveria, edhe si një reflektim i krizës së rëndë të raporteve mes tij si kreu i shtetit dhe kryeministrit.
Në argumentimin e tij, pos gjuhës teknike dhe ligjore, ai përdor dhe termin “tinzar”, referuar veprimeve të mazhorancës.
“- Mungesë transparence në procedurat e shqyrtimit të propozimeve ligjore;
– Një veprimtari tinzare të deputetëve të Kuvendit, të cilët mbrojnë dhe promovojnë dhënien me koncesion të pasurisë publike të shqiptarëve pa asnjë kufizim;
– Ndikimin e deputetëve të Kuvendit nga interesat e lidhura me koncesionimin e pronës publike;
– Mungesë transparence ndaj qytetarëve në propozimet e pakërkuara/PPP që janë administruar gjatë kësaj periudhe nga autoritetet kontraktuese, duke qenë se tashmë nisma për kufizimin e propozimeve të pakërkuara dihej dhe njihej”, shprehet ndër të tjera Meta.
Ka reaguar zëdhënësja e qeverisë Erisa Spiropali, e cila, referuar dhe kthimit të ligjit mbi ndryshimet në Kodin Penal, ndodhur një ditë më parë, shkruan: “Me një fjalor të katandisur si mos më keq ai qëlloi mbi shumicën dhe opozitën parlamentare, ai na rikujtoi se nuk kemi më President, po në vend të Presidentit na ka mbetur një karrikaturë e vetë Ilir Metës”. /tesheshi.com/
