Presidenti Meta e nisi ditën, si zakonisht këto kohë krize, duke ofruar recetat e tij politike, në krye të të cilave qëndron 13 Tetori, të cilën e ka dekretuar si datë zgjedhjesh, por që vijon të injorohet tërësisht si nga mazhoranca është dhe nga ndërkombëtarët. Madje dhe nga PD. E ndaj kreut të kësaj të fundit, ka shfaqur kritikën ndaj sajesës së “85-përqindëshit”, të cilën Basha e promovon me forcë, madje dhe me një tur në Shqipëri, duke pretenduar se është shifra reale e bojkotit të 30 Qershorit, e përkthyer më pas si votë për opozitën.
“Fitoret e thella që gëzojnë liderët dhe pasojat e rënda që penalizojnë Shqipërinë dhe shqiptarët
E kam fjalën për fitoren ‘e vërtetë’ të mazhorancës aktuale, që në zgjedhjet e saj të njëanshme dhe të paligjshme, shpalli fitoren në 100% të bashkive të Shqipërisë, si edhe të këshillave bashkiakë.
Por edhe entuziazmi i liderëve të opozites se ata fituan 85% është mbresëlënës, duke harruar se sikur opozita të ishte regjistruar në kohë para shfuqizimit të 30 qershorit si datë e zgjedhjeve do t’i mjaftonte të kishte për vete, jo më shumë se 1/4 e 85% për të arritur një fitore reale dhe institucionale në shumicën dërrmuese të njësive vendore”, shkruan Meta.
Më tej, në pozitën e moralistit politik, kreu i shtetit, me përdorimin ironik të një fjale të huazuar nga fjalori i ish-diktatorit Hoxha, godet dy palët në funskion të shenjtërimit të vetes, e gjitha duke iu referuar negociatave.
“‘Fitorje’ të tilla penalizojnë rëndë të ardhmen e vendit, pasi jo vetëm garantojnë një disfatë në 18 tetor për çeljen e negociatave në mënyrë te sigurtë, por lenë pa mbrojtje nga të drejtat e tyre të gjithë qytetarët shqiptarë, të cilët jetën e tyre të përditshme e kanë aq të lidhur me shërbimet e pushtetit vendor.
Ndërkohë asgjesimi i llogaridhënies së pushtetit vendor (pas atij qendror), i shërben vetëm pakicës që nuk njeh rotacion dhe të përzgjedhurve të saj për të administruar çdo pushtet, pasuri dhe pronë publike, në mënyrë arrogante dhe të pakontrolluar.
Viktimat e këtyre ‘fitorjeve’ janë të gjithë qytetarët shqiptarë pa dalllime partiake.
Për integrimin as bëhet fjalë por mbetet vetëm të shpresojmë të mos na ndëshkojnë në institucionet aktuale, që merren me mbrojtjen e autonomisë vendore, demokracisë vendore dhe të drejtat e njeriut”, shkruan Meta. /tesheshi.com/
