Ilir Meta ka folur sërish me gjuhën e një udhëheqësi shpirtëror sesa politikani. Duke u pozicionuar si klerik, kreu i LSI ka dhënë këshilla të natyrës klerikale klasës politike, teksa ka qenë duke folur me struktura të partisë së tij në Novoselë të Vlorës.
“Është koha që ne politikanët shqiptarë të marrim vendime të rëndësishme sot bazuar në dashurinë për vendin e përgjegjshmërinë për të ardhmen e tij e jo bazuar në urrejtjen ndaj njëri-tjetrit dhe filozofinë e përjashtimit. Kjo është ajo që duhet të na bashkojë që t’i japim vendit stabilitet, t’u japim qytetarëve siguri, t’u japim qetësi, besim dhe shanse për t’u punësuar dhe për të zhvilluar degët më potenciale për rritjen ekonomike të vendit”, tha z. Meta.
Prej kohës, ligjërimi politik i LSI-së ka marrë dhe nota populiste. Lidershipi i kësaj force e shpall veten si një shërbyese e përunjur e popullit, e njerëzve të thjeshtë, e gjendur gjithnjë pranë tyre.
Ndërkohë, pak vite më parë, lindën dhe dy vargje me thelb ironik adresuar kësaj partie: “Kush m’i zgjidh hallet e mia, Ilir Meta, LSI-ja”. /tesheshi.com/
