Kryetari i Kuvendit, Ilir Meta i ka dhënë një rëndësi të vençantë axhendës evropiane të vendit, e cila sipas tij duhet të qëndrojë mbi ato politike apo elektorale. Këto deklarata Meta i bëri gjatë një takim me drejtorin e përgjithshëm për Zgjerimin në Komisionin Evropian, Christian Danielsson.
“Dialogu politik është shumë i rëndësishëm për mbarëvajtjen e një klime bashkëpunuese në parlament me qëllim shmangien e vonesave të panevojshme për axhendën europiane të vendit, e cila duhet të qëndrojë mbi axhendat e ngushta politike apo elektorale”, tha Meta.
Ata biseduan edhe mbi rekomandimet e progres-raportit të fundit të Komisionit Evropian për Shqipërinë.
Meta shprehu mirënjohjen për punën e kryer nga Komisioni Evropian dhe vuri në dukje se rekomandimi pozitiv për çeljen e bisedimeve, për anëtarësim në BE reflekton përpjekjet e Shqipërisë, për të avancuar në rrugëtimin e saj evropian. Në këtë kuadër, ai theksoi se kuvendi e ka lexuar progres-raportin me kujdes dhe të gjithë rekomandimet e Komisionit do të reflektohen në Planin e Veprimit të Kuvendit të Shqipërisë.
Nga ana tjetër, drejtori i përgjithshëm për Zgjerimin në Komisionin Evropian, Christian Danielsson e përgëzoi kreun e kuvendit për arritjet dhe e siguroi atë për mbështetjen e plotë të Komisionit ndaj përpjekjeve të kuvendit në drejtim të bashkëpunimit politik, garantimit të gjithë-përfshirjes dhe forcimit të bashkëpunimit me shoqërinë civile, apo institucionet e pavarura.
Në përfundim, u diskutua mbi zhvillimet në rajon dhe u nda bindja se stabiliteti i Ballkanit ka rëndësi jo vetëm për qytetarët në rajon, por edhe për sigurinë e të gjithë Bashkimit Evropian./tesheshi.com
