Nëse PS-ja dhe PD-ja nuk do të bien dakord për një nen të asaj që quhet reformw në drejtësi, të drejtën e formulimit përfundimtar do ta kenë ekspertët e misionit të SHBA-së dhe BE-së në Shqipëri.
Ky ka qenë thelbi i asaj që është arritur në një takim që ka zhvilluar sot ambasadori i SHBA-së në Tiranë, Donald Lu dhe ajo e BE-së, Romana Vllahutin.
Zyra e shtypit e Kuvendit, në një njoftim për shtyp, bën të ditur se kryeparlamentari Ilir Meta ka deklaruar mbështetjen e tij maksimale dhe konkrete për përmbylljen me sukses të procesit të ndryshimeve kushtetuese, mbështetur mbi bazën solide dhe profesionale të rekomandimeve përfundimtare të Komisionit të Venecias.
Siç bëhet e ditur në njoftim, “Kryetari i Kuvendit vuri gjithashtu në dukje se është e domosdoshme që të gjitha palët të kenë një lexim racional dhe objektiv ndaj opinionit përfundimtar të Komisionit të Venecias. Ai theksoi se për të gjitha çështjet që palët ndajnë qëndrime të ndryshme, duhet t’i adresohen ekspertëve të EURALIS-it dhe OPDAT-it, opinioni i të cilëve duhet të shërbejë si bazë për konsensusin përfundimtar dhe miratimin sa më parë të kësaj reforme madhore për vendin dhe qytetarët shqiptarë”.
Pra, pikërisht kjo frazë tregon dhe thelbin e këtyre bisedimeve dhe mënyrën që do të ndjekë reforma tani e tutje.
Misioni i SHBA-së dhe BE-së do të kenë të drejtën e fundit për të gjetur formula kompromisi, të cilat natyrisht duhet të miratohen nga palët.
Pas kësaj formule pritet qëndrimi i Partisë Demokratike, i cili sipas të gjitha gjasave, do të jepet në Komisionin e Posaçëm të Reformës për Drejtësi./tesheshi.com/
