Presidenti Meta dekoroi me titullin më të lartë, “Gjergj Kastrioti Skënderbeu”, Kardinalin Ernest Simon Troshani.
Ceremonia u zhvillua në kishën e Shën Andonit në Laç, ku kreu i shtetit e vlerësoi klerikun e lartë katolik si një promovues vlerash të gjithëanshme.
“Jemi këtu në kishën simbol të qëndresës dhe lutjeve për të nderuar një nga simbolet e gjalla si rrallëkush tjetër të qëndresës dhe lutjeve, një personalitet të spikatur të besimit katolik, një promovues universal të vlerave të paqes, dashurisë, humanizmit, harmonisë dhe bashkëjetesës ndërfetare, Kardinalin Ernest Troshani. Dëshiroj të nderoj kardinalin e shquar me dekoratën më të lartë Gjergj Kastrioti Skënderbeu”, tha presidenti Meta, që më pas dorëzoi dekoratën me këtë motivacion:
“Kardinalit të shquar shqiptar, përfaqësuesit të brezit të jashtëzakonshëm të klerikëve katolikë që jetën ia kushtuan besimit të palëkundur ndaj Zotit, dashurisë së pakushtëzuar ndaj njerëzve, vlerave të larta shpirtërore dhe morale, lirisë së ndërgjegjes e qëndresës dinjitoze në shërbim e në respekt të atdheut dhe kombit”. /tesheshi.com/
