“Nganjëherë rikthehen”, thonë italianët? Kush? Fantazmat? Jo tamam, por dalin skeletet nga dollapët!
E mbani mend që në korrik u bë gati Rexhep Meidani që të bëhej kryeministër dhe Ilir Meta, Koço Kokëdhima dhe Lulzim Basha bënë gati gjithçka për ta rrëzuar Edi Ramën e më pas u kthyen mbrapsht?
Ish-Presidenti dhe numri dy i PS-së, Rexhep Meidani ka ridalë në skenë kësaj radhe si kandidati i qeverisë së dytë teknike në letër, pasi e para u rrëzua.
Ilir Meta i ka bërë prezent Edi Ramës pikërisht këtë variant gjatë mëngjesit të punës në “Sofrën e Ariut” dhe Rama i është përgjigjur që kreut të Kuvendit i mungon fantazia përderisa nxjerr një kartë tashmë të përdorur.
Por kreu i LSI-së ka qenë serioz dhe i ka përmendur se një numër deputetësh socialist janë gati ta mbështesin këtë tezë.
Dhe menjëherë pas takimit kanë qenë qarqe shumë pranë Ilir Metës: mediat e Lesit dhe Zhejit që kanë rihedhur në treg ish-presidentin fizikant.
Ndërkaq, këto qarqe po bëjnë presion dhe diversion në opinionin publik duke botuar lajme se Edi Rama ka nisur të tërheqë gjërat e tij nga selia e Kryeministrisë.
“Rreth kësaj çështje duhet të ketë qenë dje takimi Rama-Meta në pikë të mëngjesit, kur edhe gjelat nuk ishin zgjuar nga gjumi.
Më pas nga dreka burimet kryeministrore tregojnë se kanë filluar zbrazja e disa orendive personale nga zyra e kryeministrit si dhe po mendohet për të hequr pikturat e grafikat nga zyra e Ramës, sepse kryeministri i ri nuk do jetë artist. Mendohet se do jetë nga fusha e shkencave ekzakte. Mundet edhe ish-president”.
Një presion i pastër, që po kombinohet edhe nga fronti i opozitës.
Pas sulmeve në lidhje me Xhafën për disa ditë, tashmë persona shumë pranë familjes së Berishës kanë shpërndarë lajmin e “sigurt” sipas tyre që Presidenti Bujar Nishani nuk e ka firmosur emërimin e Fatmir Xhafajt dhe pritet që ta refuzojë.
Presidenti i Republikës pritet që të shprehet ditën e nesërme për këtë çështje, por siç duket, sipas njerëzve pranë tij, që janë edhe drejtues në PD, ai e ka refuzuar Xhafajn.
Situata është kthyer në korrik të vitit të kaluar.
Edi Rama ndodhet i rrethuar. Nëse atëherë lëshoi pak në kontrollin e vettingut, e pa më në fund që nuk i vleu asgjë. Nëse lëshon tani nuk flitet thjesht për marrjen e qeverisë por edhe të PS-së. Madje janë bërë gati edhe njerëzit.
Keni marrë vesh se në Tiranë është rikthyer Fatos Nano…/tesheshi.com/
