Fotoja e një mësueseje të plagosur me kokë në fillim të pushtimit rus të Ukrainës bëri shpejt xhiron e botës, duke u treguar të gjithëve brutalitetin e luftës. Olena Kyrillo humbi shikimin në njërin sy kur një raketë ruse
shkatërroi banesën e saj në Kharkiv. Tashmë 53-vjeçarja po përpiqet të shërojë plagët e lëna nga sulmi rus.
Ajo arriti të zhvendoset në Poloni ku u shtrua në një qendër të specializuar okulistike për t’iu nënshtruar një operacioni për t’i rikthyer shikimin. Siç i kishin thënë, nëse nuk do t’i nënshtrohej një operacioni, do të humbiste syrin.
Pavarësisht se ajo iu nënshtrua tre operacioneve, mjekët e saj kurues arritën në përfundimin se nuk ishin në gjendje t’i shpëtonin shikimin. Është tregues se pas një operacioni rraskapitës prej 3.5 orësh ata arritën të rivendosin vetëm 1/3 e shikimit të saj. Madje i thanë se më e mira që mund t’i ofronin ishte vizioni 20% dhe do t’i duhej të operohej çdo 2-3 muaj gjatë gjithë jetës së saj.
Që nga sot, 10,000 paund janë mbledhur përmes donacioneve në mënyrë që Olena të fluturojë në Mbretërinë e Bashkuar, ku mjekët kryesorë të syrit i kanë thënë asaj se mund t’i rikthejnë sërish shikimin. “Më dhanë shpresë për syrin dhe jetën time dhe shpresa është shumë e rëndësishme”, tha ajo e emocionuar.
Dy ditë pas mbërritjes së saj në Londër, mësuesja kaloi pragun e qendrës së specializuar të syve.
Atje ajo u ekzaminua nga profesori Tom Williamson i cili i tha se “kisha frikë se do të ishte shumë më keq. Duke marrë parasysh traumën që ka pësuar syri juaj, fakti që ju mund të shihni qoftë edhe pak është një shenjë e mirë. Syri juaj nuk do të kthehet kurrë në normalitet, por jam i sigurt se mund të rivendosim deri në 50 për qind të shikimit tuaj me një operacion.”
“Jam shumë mirënjohëse për mirësinë e atyre që më ndihmuan dhe më bënë të mos dorëzohem kurrë”, u përgjigj ajo pasi falënderoi ata që e ndihmuan të shpëtonte nga vorbulla e luftës.
Profesor Williamson do ta riekzaminojë atë në tetor dhe operacioni do të bëhet në janar të 2023.
Në momentin e sulmit në pallatin ku ndodhej shtëpia e saj, ajo ishte ulur në divan duke kontrolluar dokumentet e nevojshme që duhet të kishin me vete që në momentin që do të dilnin nga shtëpia. Në atë çast pati një shpërthim dhe ajo pa copa xhami që po vinin drejt saj. “Xhami i dritares u thye në një mijë copa të vogla. Është një mrekulli që mbijetova. Thjesht mbaj mend që mendoja se nuk jam gati të vdes”, tha ajo. /tesheshi.com/
