Siç njofton The Mirror, një mësuese zëvendësuese është pushuar nga puna pas raportimeve se e kishte quajtur terrorist një nxënës musliman të moshës 12 vjeç.
Një burim bëri me dije se mësuesja i kishte përdorur këto fjalë pasi djali ishte ankuar për dënimin që i ishte dhënë.
Burimi do të tregonte se mësuesja kishte thënë para tërë klasës: “Unë nuk negocioj me terroristë”. I habitur, nxënësi i qe kthyer me fjalët, “Si më quajte?”
Megjithatë, gjithnjë duke iu referuar burimit, mësuesja kërkoi falje pasi djali i tha se do ta bënte të madhe çështjen.
Drejtuesit e shkollës do të reagonin aty për aty, duke e pushuar nga puna mësuesen. “Ne vepruam sapo u vumë në dijeni për këtë incident, çka çoi në pushimin e menjëhershëm të mësueses zëvendësuese,” thuhet në një njoftim të Mark Philips-it, drejtorit të shkollës së mesme Deptford Green në juglindje të Londrës.
“I kemi kërkuar falje nxënësit dhe nënës së tij, dhe i siguruam se nuk do të tolerojmë asnjë formë nëpërkëmbjeje apo racizmi në shkollën tonë,” vijon njoftimi.
Incidente të tilla janë bërë të shpeshta kohët e fundit, dhe ato i detyrohen frymës së shtuar të islamofobisë, posaçërisht në Britani. /tesheshi.com/
