Për shkak të mungesës së mësuesve, shkollat në Gjermani po mbështeten gjithnjë e më shumë tek njerëzit pa përvojë apo diploma të përshtatshme. Dy të tretat e drejtorëve të shkollave (66 përqind) tani punësojnë mësues që nuk kanë marrë një kualifikim profesional, tregoi sondazhi.
Kjo përqindje është rritur ndjeshëm në pesë vitet e fundit, sipas një sondazhi nga Instituti Forsa me më shumë se 1300 drejtorë në të gjithë Gjermaninë. Në vitin 2018, vetëm 37 për qind e drejtorëve raportuan se punësuan mësues pa kualifikime të duhura.
Shoqata Gjermane për Arsim dhe Trajnim (VBE) prezantoi rezultatet e anketës të premten, më 24 nëntor, në Kongresin e Menaxhimit të Shkollës në Dusseldorf.
Mungesa e kuadrit profesional pedagogjik është ende problemi më i madh për 62 për qind të drejtorëve, ndonëse më pak se vitin e kaluar, kur ankoheshin 69 për qind.
Më shumë se një e treta e drejtorëve përmendën përfshirjen dhe integrimin si problemin më të madh. Një në katër ankohej për shumë punë dhe mungesë kohe.
Gjysma kanë deklaruar se të paktën një vend mësimdhënës në shkollën e tyre nuk është plotësuar në fillim të këtij viti shkollor.
Për 17 për qind, kishte deri në tre ose më shumë vende të lira. Sipas anketës, mësuesit që nuk kanë kryer formimin e zakonshëm profesional për këtë profesion punojnë në të gjitha llojet e shkollave në Gjermani, shkruan dpa. /tesheshi.com/
