Ç’mendon Messi për ikjen e rivalit të tij mbretëror te “Zonja e Vjetër”? Ka qenë një pikëpyetja e madhe dhe e mundimshme disajavore për opinionin sportiv, ajo që se ç’bluante në kokë ylli argjentinas nga ikja e Ronaldos, rivalit që ia shton dhe më shumë shkëlqimin kur janë afër njëri-tjetrit, si gjithë këto vite në La Liga.
Për dy muaj, argjentinasi ishte i heshtur, nuk dha asnjë deklaratë për largimin e portugezit drejt Apenineve. Megjithatë, ai foli dje në një intervistë me median spanjolle.
“Real Madrid është shumë i dobësuar nga largimi i Cristiano Ronaldos për shkak se ai është një nga lojtarët më të mirë në botë. Juventus tani është favorit për të fituar Ligën e Kampionëve me Ronaldon. Sinqerisht, unë u befasova me vendimin e tij për të lënë Realin dhe shkuar te Juventus”, ka thënë Messi dhe vazhdoi:
“Juventusi është një ekip i madh dhe tani do të jetë shumë më i fortë dhe më konkurrues në Ligën e Kampionëve. Qëllimi ynë është që këtë sezon të përpiqemi për ta fituar këtë kompeticion dhe do të bëjmë gjithçka që t’ja arrijmë”.
Leo Messi dhe Cristiano Ronaldo kanë dominuar të gjithë këto vite futbollin, veçanërisht atë europian, duke qenë pjesë e dy gjigandëve spanjollë. Ata janë parë si rivalë, jo vetëm për shkak të kualitetit individual por dhe trofeve të fituar. Derbi historik e monumental Real – Barcelona, ndër më të famshmit në botë, ka qenë dhe një përballje fantastike Messi – Ronaldo.
Edhe pse opinion ka tentuar t’i sheh dhe si armiq në rivalitetin mes tyre, që të dy kanë ruajtur një etikë të admirueshme duke e vlerësuar rregullisht njëri-tjetrin. /tesheshi.com/
