Në të parën gjysmëfinale të Kupës së Mbretit, Barcelona ka fituar 1-2 në “Vicente Calderon” ndaj Atletikos së Madridit. Me këtë fitore, Barcelona është me një këmbë në finale, çka do të ishte e katërta për të radhazi në këtë aktivitet futbollistik në Spanjë.
Atletiko mund të jetë në fund të një cikli, por humbja e mbrëmshme ishte më tepër për shkak të golave të mrekullueshëm të Suarez-it dhe Messi-t.
Një ndeshje me dy pamje; një pjesë e parë shumë e mirë për Barcelonën, një pjesë e dytë që flet vetëm për Atletikon, që për pak gjë i iku nga duart barazimi.
Luis Suarez i dha shpejt fund atmosferës elektrizuese në “Vicente Calderon”, duke shënuar një gol të mrekullueshëm në minutën e 7-të. Në të 33-tën minutë e pason Messi, me një tjetër supergol.
Situata përmbyset kur nisin 45 minutat e dyta. E padorëzuar, Atletiko ngulmon, dhe golin vjen nga një goditje me kokë e Griezmann-it. Një gol që mund të ishte pasuar nga të tjerë nëse do të ishin shfrytëzuar rastet nga lojtarët e Atletikos.
Dëshpërimin e madh e tregon qartë rënia e Diego Simeones në tokë, i nervozuar nga ajo që po i shihnin sytë.
“Mund të kishte shkuar më mirë, por mund të kishte shkuar dhe më keq,” shfaqet realist pas ndeshjes Luis Enrique, tekniku i katalanasve.
“Ata na e bënë jetën të vështirë, dhe me golin e tyre e mbajnë veten në lojë”, deklaron ai.
Gjashtë ditë më pas do të jetë ndeshja e kthimit në “Camp Nou”, ku pritet një tjetër betejë; së paku, te Atletiko përbetohen se nuk janë dorëzuar. /tesheshi.com/
