Për herë të parë që nga viti 2003, as Cristiano Ronaldo dhe as Lionel Messi nuk u përfshinë në mesin e të nominuarve për çmimin e futbollit Topi i Artë, sipas agjencive.
Superylli portugez Ronaldo, i cili e fitoi çmimin pesë herë, nuk arriti të nominohej as vitin e kaluar, ndërsa Messi, i cili e fitoi atë për herën e tetë rekord në 2023 dhe është nominuar 16 herë, humbi mundësinë pavarësisht fitores së Argjentinës në Copa America këtë vit.
Spanja, fituese e Kampionatit Evropian të këtij viti, ka gjashtë lojtarë të nominuar, duke përfshirë lojtarin 17-vjeçar të Barcelonës, Lamine Yamal dhe Nic Ëilliams, Alejandro Grimaldo, Dani Olmo, Rodrigo dhe Dani Carvajal, të cilët gjithashtu fituan Champions League me Real Madridin.
Reali ka gjithsej shtatë lojtarë të nominuar, duke përfshirë Kylian Mbappe i cili së fundmi ka ardhur nga Paris St. Germain, anglezin Jude Bellingham dhe brazilianin Vinicius Junior.
Anglia, nënkampionia e Euro 2024, ka pesë të nominuar të tjerë përveç Bellinghamit, përkatësisht: Harry Kane, Bukayo Saka, Declan Rice, Cole Palmer dhe Phil Foden.
Spanjollët e presin çmimin që nga viti 1960
Rodri, i cili u shpall lojtari i turneut në Kampionatin Evropian, tha se kombëtarja e tij e meritonte që një nga lojtarët e “Furias” të fitonte Topin e Artë.
Edhe pse çmimi prestigjioz është dominuar nga lojtarët e ligës spanjolle, asnjë spanjoll nuk e ka fituar çmimin lojtari më i mirë në botë që nga i madhi i Barcelonës, Luis Suarez në vitin 1960, pavarësisht se “brezi i artë” i Spanjës fitoi Kupën e Botës 2010, si dhe 2008 dhe Kampionati Evropian 2012.
Spanja jo vetëm që pati një kampionat evropian të shkëlqyer, duke fituar të shtatë ndeshjet e saj në Gjermani, por gjithashtu shënoi 15 gola, më së shumti nga çdo ekip në turne.
Ceremonia e ndarjes së Topit të Artë 2024, e cila do të kurorëzojë lojtarin më të mirë në botë, do të zhvillohet më 28 tetor në Paris. /tesheshi.com/
