Lionel Messi bëri mbrëmë një prej paraqitjeve më të mira të kohëve të fundit. Lojtari argjentinas mori notën më të lartë në përballjen mes dy rivalëve të një qyteti, Barcelonës dhe Espanjolit.
Vetëm një gol u shënua prej tij, por loja e yllit të Barcelonës qe e mbushur me driblime të njëpasnjëshme të kundërshtarëve, përpos dy pasimeve për gol.
Barcelona duket të ketë ndezur përsëri motorët për t’iu kundërvënë Realit të Madridit në sfidën e përhershme mes dy klubeve më të mëdha të futbollit spanjoll. Dhe kjo falë Iniesta-s, që me kthimin pas një dëmtimi i ka dhënë tjetër hov lojës së katalanasve.
Këtë e tregoi më së miri ndeshja e së dielës ndaj Espanjolit. Serinë e golave e hapi Suarez, që mori shkëlqyeshëm një top të pasuar mjeshtërisht nga larg prej Iniesta-s, për ta dërguar më pas atë në rrjetë. Spektakli i Messi-t solli golin e dytë të Suarez-it në minutën 67-të. Një minutë më vonë qe Jordi Alba që përfitoi nga mrekullitë e Messi-t me topin. Ky i fundit shënoi dhe vetë në fund të ndeshjes. David Lopez realizoi të vetmin gol për Espanjolin.
Fitorja 4-1 e ngjit Barcelonën në kuotën e 34 pikëve në kampionatin spanjoll pas 16 javësh. Katalanasit mbajnë vendin e dytë në renditje, tre pikë pas Realit të Madridit, që kanë një ndeshje më pak. /tesheshi.com/
