Afër 40 ditë më parë, pak pasi kishte humbur 11-metërshin, e po ashtu finalen e Kupës së Amerikës ndaj Kilit, numri 10 i Argjentinës lajmëronte largimin nga kombëtarja.
Dështimet e njëpasnjëshme me përfaqësuesen e kishin bërë të tyren, e kishin ulur në gjunjë yllin e futbollit botëror. Vendimi për të mos luajtur më me Argjentinën dukej i pakthyeshëm, ndërkohë që shumë bashkëlojtarë të tjerë deklaruan se do ta ndiqnin Messi-n në zgjedhjen e tij.
Fatmirësisht, lojtari numër një i Barcelonës ngjan të ketë kthye mendje, sipas një deklarate që qarkullon tashmë në shtypin argjentinas.
“Shumë gjëra më shkuan në mendje natën e finales (me Kilin), dhe mendova seriozisht të largohesha, por dashuria ime për vendin dhe për këtë bluzë është gjithashtu e madhe,” bëhet e ditur të jetë shprehur më i miri futbollist argjentinas i ditëve të sotme.
“Duhet të rregullojmë shumë gjëra në futbollin argjentinas, por unë parapëlqej ta bëj këtë nga brenda, e jo të kritikoj nga jashtë,” vijohet me fjalët e Messi-t.
Ai është thirrur në kombëtaren e Argjentinës për dy ndeshjet e ardhshme eliminatore për Kupën e Botës të 2018-tës, për atë të 2 shtatorit ndaj Uruguajit, e të pesë ditëve më pas ndaj Venezuelës.
Me flokë të ngjyrosura, me pamje të ndryshuar, Messi duket ta ketë lënë pas zhgënjimin e finales së Kupës së Amerikës, teksa u pa ditë më parë të bënte protagonistin e padiskutueshëm në një përballje të Barcelonës me Sampdorian, duke shënuar dy gola e duke qenë pjesëmarrës në një tjetër. /tesheshi.com/
