Fituesi pesë herë i Topit të Artë, argjentinasi Lionel Messi po i afrohet dalëngadalë thyerjes së një tjetër rekordi.
Ylli i Barcelonës e çoi në 50 numrin e golave të shënuar për kombëtaren argjentinase teksa realizoi me 11-metërsh të mërkurën ndaj Bolivisë. Një ndeshje e luajtur për eliminatoret e Kupës së Botës së 2018-ës, e të cilën Argjentina e fitoi 2-0.
Golashënuesi më i mirë i Argjentinës në tërë historinë e përfaqësueses është Gabriel Batistuta, i cili ka një dekadë e më tepër që e ka mbyllur karrierën futbollistike.
Ish-lojtari i Fiorentinës, Romës e Interit, ka shënuar 56 gola me bluzën e Argjentinës, si askush tjetër. Në nivel klubesh, Batistuta e pati shkëlqimin e tij me Fiorentinën, për të cilën luajti nga viti 1991 në vitin 2000. I quajtur ndryshe dhe Batigol, ai shënoi 168 gola në 269 takimet që zhvilloi për ekipin e Firences.
Vetëm 28 vjeç, Messi duket se nuk do ta ketë të vështirë ta thyejë dhe rekordin e Batistutës, për t’u bërë golashënuesi më i mirë i përfaqësueses argjentinase në të tëra kohërat.
Listën e golashënuesve të Argjentinës e kryeson Batistuta, me 56 gola, i ndjekur nga Messi, me 50 gola. Hernan Krespo ka shënuar 35 gola për vendin e tij, një më shumë se Diego Armando Maradona. Nga futbollistët e tjerë që janë në aktivitet, Aguero është në nivelin e 32 golave, kurse sulmuesi i i Napolit, Gonzalo Higuain i ka tundur 25 herë rrjetat kundërshtare me bluzën e Argjentinës. /tesheshi.com/
