Lionel Mesi “i ka këputur nja dy kopaçe”, në një intervistë dhënë për mediat në Argjentinë.
“Pleshti” i Barcelonës, të cilit i mungon shumë një Kupë Bote, për të hyrë si pretendent për lojtarin më të mire të të gjitha kohërave, ka deklaruar se nëse Argjentina shpallet kampione në Rusi, do ta bëjë në këmbë rrugën nga shtëpia në Rosario, deri tek statuja e Virgjëreshës, thënë ndryshe një distancë afro 50 kilometra.
Normal që të gjithë mediat e kanë përcjellë këtë përgjigje, si argument për dëshirën gati në obsesion të Mesit, për ta udhëhequr Argjentinën drejt titullit Kampion Bote. Me ç’ duket finalja e humbur ndaj Gjermanisë në Botërorin e 2014-ës, nuk është kapërdirë mirë prej tij, ndaj është i vendosur të luajë shansin e fundit të jetës, për të fituar një Botëror.
Por pa mbyllur mirë jehonën e kësaj deklarate, Leo ka lëshuar një tjetër, që ka “ngrirë” zemrat e tifozëve e drejtuesve të Barcelonës. “Nuk e di cfarë do të ndodhë me rinovimin tim, varet si do të jem dhe cfarë do ofrojë realiteti.
Unë e jetoj jetën ditë pas dite, jo të planifikuar” – është shprehur numri 10 i katalanasve. Të gjithë në Barcelonë janë shqetësuar për këtë deklaratë, që mund te jetë krejt spontane dhe e paqëllimtë, por edhe mund të ketë pasur kuptim të nënfishtë, si paralajmërim për një erë divorci sportiv.
/tesheshi.com/
