Bashkësia katolike shqiptare e ka ditë të shënuar këtë të shtunë të 5 nëntorit, ku në Shkodër, qytetin-seli të katolicizmit shqiptar, është mbajtur një meshë solemne në kuadër të lumturimit të 38 martirëve të Kishës Katolike.
“Është një ditë feste sot për shqiptarët e pranishëm jo vetëm këtu në Shkodër por edhe në shumë qytete të tjera në Shqipëri dhe jashtë saj. Vetëm dy muaj pas shenjtërimit të Nënë Terezës së Kalkutës, lumnimi i 38 martirëve shqiptarë u kujton të gjithëve se në tokë e mira pengohet vazhdimisht prej së keqes. Megjithatë, nuk janë përndjekësit, por martirët protagonistët e vërtetë të historisë së njerëzimit”, tha në fjalën e tij Kardinal Angelo Amato.
38 figura katolike konsiderohet martirë nga kisha për shkak se u përballën me komunizmin dhe u ekzekutuan prej tij. Portretet e tyre ishin dhe pjesë e dekorit festiv gjatë vizitës së Papa Françeskut dy vite më parë në Tiranë.
Kjo ceremoni ka sjellë në Shkodër një numër të madh pelegrinësh edhe nga rrethe të tjera, si dhe klerikë katolikë nga vende të ndryshme të botës. /tesheshi.com/
