Papa Françesku u ka bërë thirrje politikanëve që të lënë mënjanë grindjet partiake në mënyrë që të trajtojnë pandeminë në një mënyrë unike.
Mesha të përditshme mëngjesore nga ana e Papës janë transmetuar drejtpërdrejt në televizion për gjashtë javët e fundit që nga shpërthimi i epidemisë në Itali, ku çdo ditë, ai zgjedh një temë sipas gjykimit të tij, siç është falënderimi i atyre që ofrojnë shërbime mjekësore dhe të tjera kyçe, raportojne mediat.
Por i fundit duket sikur shkon për politikën shqiptare, në Tiranë apo Prishtinë, gati e pandryshuar në lloj lufte paçka krizës pandemike.
“Ne lutemi sot për burra dhe gra që e kanë profesion politikën”, tha Françesku, duke shtuar se “politika është një formë e lartë e punës humanitare”.
“Ne po lutemi për partitë politike në vende të ndryshme në mënyrë që në këtë kohë krize të punojnë së bashku për të mirën e vendeve të tyre dhe jo për përfitimin e tyre,” tha ai.
Udhëheqësi fetar i një komuniteti prej 1.3 miliardë katolikësh në të gjithë botën nuk ka përmendur asnjë vend apo politikan konkret.
Françesku, i cili mban mesha dhe audiencë të përgjithshme pa pjesëmarrje të publikut, tërhoqi vëmendjen për efektet e krizës në kategoritë më të rrezikuara të shoqërisë, veçanërisht të pastrehët dhe migrantët.
Ai më parë ka bërë thirrje që një vizion i botës të përqafohet nga të gjithë pas krizës COVID-19, duke thënë se veprimi pa solidaritet global ose përjashtimi i disa kategorive të njerëzve nga procesi i rimëkëmbjes do të rezultojë në një “virus edhe më i keq”. /tesheshi.com/
