Kreu i katolikëve të Kosovës, Dom Lush Gjergji, shfrytëzoi meshën e Krishtlindjeve për të përcjellë dhe ai mesazhin e nevojës që VV e LDK të arrijnë kompromisin, e për rrjedhojë të formohet qeveria e re.
Sipas tij, ngërçi është krijuar nga mosdashuria për njëri-tjetrin, nën frymën e besimit.
“Po të arrinim këtë nivel feje, këtë hapësirë dashurie dhe këtë mundësi shenjtërimi, atëherë të gjithë ne do të ishim më të shenjtë dhe jeta jonë do të ishte krejt ndryshe, por edhe shoqëria jonë do të ishte shumë më mirë, çdo gjë, në mesin tonë nuk do të kishim më të varfër që dimrin e kalojnë pastrehë.
Nuk do të kishim konflikte e mosmarrëveshje me njëri-tjetrin, e as në mes atyre që bartin përgjegjësi publike ose pushtete politike.
Po ashtu, nuk do të shihnim se si rrezikohet fati i popullit dhe si frenohet vullneti i qytetarëve, duke e zvarritur dialogun, por do t’i kishim tashmë institucionet e shtetit e do t’i shihnim duke bashkëpunuar e duke bashkëndarë përgjegjësitë, për një jetë më të mirë të njerëzve dhe të ardhme më të mirë të vendit”, tha kleriku më i lartë katolik i Kosovës. /tesheshi.com/
