Kryeministri shpalli faljen e të gjitha gjobave të deritanishme ndaj shkelësve në kushtet e kufizimit të lëvizjes, përfshirë dhe patentat e hequra dhe bllokimet e makinave, duke e bërë si tolerim para një furtune, gjithnjë nëse do vijojë shkelja e rregullave, të cilat tashmë do kenë dhe penalitete, me ndryshimet në Kodin Penal, në kuadër të krizës koronare.
Sipas tij, kjo mostolerancë më do vijë paralelel me hapjen e ngadaltë që pritet të ndodhë që nga java tjetër.
“Sot dua t’u jap një provë të thjeshtë, se ndëshkimet nuk janë plan për t’u bërë si Enveri sikur më akuzojnë për domosdoshmëri për të forcuar. Janë ekzekutuar deri tani 7107 gjoba për këmbësorët dhe 1941 gjoba për drejtues automjeti. Të cilat janë shoqëruar me pezullim të lejes së drejtimit për tre vite dhe bllokim të makinës. Ne sot kemi vendosur mos ekzekutimin e këtyre gjobave dhe kthimin e të gjitha patentave dhe të gjitha mjetet e bllokuara. Javën e ardhshme me hyrjen në fuqi të Kodit të ri Penal le të startojnë të gjithë të barabartë“, tha Rama.
Ai përmendi disa aspekte të hapjes, duke thënë fillimisht se: “Javën e ardhshme do të punojnë krejt lirisht brenda fashës së përcaktuar nga 05:00-17:30 apo me turne, të gjitha ata që nga nesër paradite do të jenë në kategoritë e lejuara që do të publikohen në faqen e e-Albania.
Të gjitha bizneset në të gjitha këto kategori duhet të sigurohen që në cdo kolektiv të mësohet se cilat janë detyrat dhe të respektohet protokolli i sigurisë sipas rregullave të përcaktuara, por edhe të mësojnë pasojat penale për shkelësit e këtyre rregullave“.
“Po ashtu javën e ardhshme do të autorizojmë edhe lëvizjen me automjet për arsye shëndetësore, duke parë që shpesh, unë personalisht apo të tjerë kemi ndeshur në ankesa legjitime, por autorizimi duhet të mbështetet te një dokument mjekësor që drejtuesi i makinës duhet ta mbajë me vete. Lejemarrësi duhet ta lexojë mirë pasojën penale” tha Rama.
Më tej, ai rezervoi dhe një “dhuratë” lirie për pensionistët: “Nesër pensionistët do të mund të dalin, jo për vizita, as për domino, as për ulje të rrezikshme në grup, por për ajrosje, ecje deri në orën 11:00 paradite, jo më shumë se me një tjetër pensionist, por duke ruajtur distancën“, tha Rama.
Ndërsa sa për qarkullimin e automjeteve, Rama tha:
“Javën e ardhshme në platformën e-albania do të merret autorizim javor për ata që janë në punët e lejuara dhe automjeti mund të lëvizë për vajtje ardhje në punë me vetëm një person në sedilejn e pasme diagonal i cili mund të jetë vetëm një koleg në të njëjtin vend pune. Kush merr leje duhet ta lexojë mirë pasojën penale që vjen. Ne do të bëjmë që nesër, mbase që sot mbasdite, një test dhe do të provojmë mirëfunksionimin e këtij instrumenti që i jep fund një faze në policinë e shtetit, me e-mail ku për shkak të shtrëngesave dhe kujdesit ka pasur masivisht refuzime, edhe mospërgjigje që kanë shkaktuar dhimbje koke. Ndjesë për to, por shëndeti mbi të gjitha”. /tesheshi.com/
Fjala e plotë:
https://www.facebook.com/edirama.al/videos/180159656338600/?t=2
