“Institucionet e Kosovës nuk duhet të nxitojnë me transformimin e Forcës së Sigurisë së Kosovës në Forca të Armatosura”. Kjo është thirrja që ka bërë nga Prishtina, për politikën kosovare, zëvendës-ndihmës sekretari i përgjithshëm i NATO-s për operacione, John Manza gjatë një ligjërate me temën, “NATO dhe Ballkani Perëndimor”, të organizuar nga Qendra Kosovare për Studime të Sigurisë.
Manza tha se sekretari i përgjithshëm i NATO-s e ka bërë të qartë që ushtria duhet të bëhet përmes ndryshimeve kushtetuese.
“Këshilla ime është që mënyra më e mirë për të garantuar transformimin e FSK-së në Forca të Armatosura është transformimi i matur, hap pas hapi, dhe jo vendimet e shpejta. Lëvizjet e shpejta në këtë proces, siç u tentua muaj më parë, mund të rrezikojnë bashkëpunimin e vendosur për një kohë të gjatë dhe NATO kërkon që ky proces të zhvillohet në harmoni me Kushtetutën. Nëse transformimi nuk bëhet në mënyrë të drejtë, mund të rrezikohet gjithë bashkëpunimi”, tha Manza, duke aluduar në nismën e presidentit Thaçi për bërjen e ushtrisë përmes ligjit, por i cili më pas ishte tërhequr nga agjenda e Kuvendit, për shkak të vërejtjeve nga NATO dhe vendet perëndimore.
Manza gjatë kësaj vizite ka zhvilluar takime edhe me liderët politik, pastaj me përfaqësues të shoqërisë civile, qytetarët, përfshi edhe studentët, për të parë se si shihen NATO dhe roli i saj në Kosovë.
Kujtojmë se partitë gjatë fushatës zgjedhore kanë premtuar bërjen e ushtrisë ku spikat premtimi i Ramush Haradinajt se një gjë e tillë do bëhet realitet brenda 90 ditëshit nëse vije në pushtet./tesheshi.com/
