Në samitin e Bashkimit Evropian-Ballkani Perëndimor në Shkup, Komisionerja e Zgjerimit e BE-së, Marta Kos, tha se reformat e kërkuara nga Brukseli nuk janë të lehta, por do të rezultojnë në ndryshime të thella sociale.
Ajo u tha udhëheqësve të Ballkanit Perëndimor se ata duhet të punojnë shumë për reformat, sepse ato sjellin stabilitet, siguri dhe prosperitet për qytetarët
Kryeministri i Maqedonisë së Veriut, Hristijan Mickoski, mikpritësi i takimit, theksoi se vizioni i Ballkanit Perëndimor nuk është të ulet në sallën e pritjes, por të lëvizë, të rritet dhe të evoluojë përmes reformave dhe bashkëpunimit të përbashkët.
Fokusi i bisedimeve në Shkup është propozimi i Komisionit Evropian për një investim prej 87.7 milionë eurosh për projekte rajonale për energji më të pastër në Ballkanin Perëndimor.
U diskutua gjithashtu vlerësimi i Planit të Rritjes për Ballkanin Perëndimor, pra iniciativat e reja dhe bashkëpunimi ekonomik përmes një tregu të përbashkët rajonal.
Përveç Kos dhe Mickoskit, në bisedimet në Shkup po marrin pjesë kryeministri i Shqipërisë Edi Rama, kryeministri në detyrë i Kosovës Albin Kurti, presidenti serb Aleksandar Vuçiç, kryeministri malazez Milojko Spajiç, kryetarja e Këshillit të Ministrave të Bosnjës dhe Hercegovinës Borjana Krišto, si dhe përfaqësues të BE-së, Bankës Evropiane për Rindërtim dhe Zhvillim, Bankës Botërore dhe organizatave rajonale.
Investimet
Plani i Rritjes për Ballkanin Perëndimor ofron përfitime për vendet e rajonit që po përgatiten për anëtarësim në BE, u theksua përpara takimit.
U theksua se qëllimi i Planit është të nxisë ekonominë e Ballkanit Perëndimor dhe të ndihmojë vendet e rajonit të bashkohen me Unionin.
Plani i Rritjes parashikon mbështetje financiare prej gjashtë miliardë eurosh, nga të cilat dy miliardë janë grante dhe katër miliardë janë kredi të buta të ofruara nga BE, për reforma dhe investime në fusha të tilla si energjia, transporti dhe transformimi dixhital, me qëllim rritjen e prosperitetit dhe stabilitetit në rajon. /tesheshi.com/
