Pas deklaratës së fortë ku sulmoi ministrin e Brendshëm, Saimir Tahiri për akzuat e ashpra ndaj gjyqtarëve, Ilir Meta ka përdorur një mesazh indirekt ndaj kryeministrit Edi Rama.
Natyrisht nëpërmjet njeriut të tij mediatik, Artur Zhejit.
Analisti i 360 gradëve është rrotlluar fuqishëm, vetëm pas një jave, prej qëndrimit të tij proqeveritar.
Zheji, i cili analizoi politikën tek “Zonë e Lirë” e Arjan Çanit, deklaroi se “Edi Rama rrëzohet në shtator pas mosmiratimit të reformës në Drejtësi”. Dhe pikërisht në shtator, sipas Zhejit vendi shkon në zgjedhje të parakohshme.
Njeriu që Ilir Meta dikur e kishte emëruar kryetar të komisionit për shpëtimin e Kushtetutës më 2008-n, deklaroi se “Rama humb shumicën në Parlament”.
Që përkthehet në mënyrë të pastër që LSI largohet nga koalicioni me Edi Ramën dhe kalon në aleancë me Lulzim Bashën.
Një version që pëlqehet shumë nga përkrahësit e PD-së, të cilët mezi presin një aleancë me Metën, të e kanë provuar gjatë viteve 2009-2013. Ajo u vjen ëmbël për t’i mbajtur në pushtet, duke jua tejkaluar ithtësirën e rrënimit si parti e si qeveri nga bashkëqeverisja me të, nëse mund të quhej bashkëqeverisje, ose qeverisje, së paku në kuptimin klasik të fjalës.
E gjithë kjo lëvizje ka ardhur pikëisht pas ftesës që Ilir Meta i ka bërë Lulzim Bashës për t’u takuar ditën e hënë për reformën në Drejtësi dhe pas sulmit ndaj Edi Ramës dhe Saimir Tahirit, për të ashtuquajturën “aferë të përgjimit”.
Këto “bombardime mediatike” padyshim që përbëjnë një sinjal më shumë sesa një version real, por shërbejnë si një “lubrifikant” për takimin me Bashën, i cili deri pas dy ditësh do të mbarset me legjenda të tjera urbane dhe hiperbola nga më të pabesueshme.
Po çfarë ka ndodhur sot realisht?!
Ambasadorët e SHBA dhe BE-së, Donald Lu dhe Romana Vllahutin shkuan në zyrën e Ilir Metës e i thanë që t’i bëjë një ftesë publike Lulzim Bashës për t’u takuar, pikërisht për të përcaktuar praktikat e pritshme parlamentare mbi reformën në Drejtësi.
Dhe kjo mund të çojë që negociatat të zhvendosen në komisionin e reformës, të cilat Basha i ka më të vështira sesa me Edi Ramën, pasi do të sulmohet nga radikalët brenda PD-së.
Në komisionin e reformës mund të arrihet një konsensus për draftin.
Megjithatë, i inkurajuar edhe nga ambasadorët, Ilir Meta mund ta përdorë takimin me kreun e opozitës për të bërë diversionin që ka yshtur vetë para takimit Rama-Basha.
Pra të flasë për kryeprokurorin e ri dhe mundësinë që të jenë pikërisht LSI dhe PD-ja, të cilat do të zgjedhin kreun e ardhshëm të Akuzës.
Dhe sipas gjasave, kjo pikë mund të jetë një kompromis shumë i pranuashëm nga ish-kryeministri Sali Berisha, por edhe nga vetë Ilir Meta, një version që amerikanët as do ta vinin fare në diskutim, por që Edi Rama me gjasë do ta refuzonte.
Ndaj, Meta, nëpërmjet Artur Zhejit i ka dërguar një mesazh direkt SHBA-së: “Nuk është gjë e mirë që amerikanët të na zgjedhin Prokurorin e Përgjithshëm”.
Nyja e Kryeprokurorit sa vjen e po bëhet sa më i qartë me afrimin e ditës së votimit të reformës në Drejtësi. /tesheshi.com/
