Një foto e çuditshme e Presidentit Ilir Meta është komentuar nga disa qarqe në vend si një mesazh i koduar nga kreu i shtetit ndaj një pjese të politikës apo qarqeve të caktuara antagoniste.
Nuk do të ishte marrë seriozisht nëse nuk do të ishte një foto pak a shumë e ngjashme edhe me një personazh tjetër të politikës shqiptare në një pozicion i përafërt.
Për çfarë është fjala?!
Ilir Kulla, një nga analistët dhe publiçistët e njohur që ka miqësi me Ilir Metën, publikoi disa foto në një poligon qitjeje, ku ai dhe Presidenti i Republikës shtinë disa plumba mbi një tabelë natyrisht mësimore.
Kulla theksonte në postimin e tij se “Konkurrencë e fortë me presidentin në tabelë, në poligon qitje. Ai mori një 10, e unë tre 9-ta!”.
Ky status u komentua menjëherë nga disa media afër LSI-së si një mesazh i koduar i Ilir Metës që i shpallte luftë kundërshtarëve të tij.
“’Armatoset’ Presidenti Ilir Meta. Cilin do të ‘qëllojë’?!”, e titulloi shkrimin Nikollë Lesi i Koha Jonë, i cili prej dy vjetësh ka një qëndrim dukshëm pro LSI-së dhe akuzator i Edi Ramës.
Ndërkohë që disa media të cilatjanë shumë akuzuese ndaj Ilir Metës, e komentuan foton si një mesazh kundër vettingut dhe përpjekjes për të kapur “peshqit e mëdhenj”.
Këto komente do të ishin marrë si ekzagjerim, nëse fotot nuk do të fshiheshin nga faqja e atij që e implantoi statusin dhe nëse nuk lidhet me një situatë të ngashme të disa muajve më parë.
Natyrisht ishim mjaft kohë para zgjedhjeve parlamentare dhe Edi Rama ishte vënë nën breshërinë e sulmeve agresive nga kundërshtarët e tij jashtë por edhe brenda mazhorancës.
Lulzim Basha kishte instaluar çadrën në bulevard dhe opozita kishte vetëm një kërkesë: largimin e Kryeministrit.
Edi Rama ia ktheu se nuk do të tërhiqet në asnjë moment, megjithëse deklaroi se donte dialog me opozitën për infrastrukturën zgjedhore.
Situata u përshkallëzua dhe disa media pranë LSI-së e acaruan gjendjen më shumë, duke dhënë një paralajmërim se do të ketë protesta të forta që do ta largojnë me forcë kreun e qeverisë nga selia ku punonte.
Në mesin e këtij debati, Edi Rama ndodhet në qytetin e Korçës dhe poston në rubrikën Photo of the Day, një imazh të tij në muzeun e ABC-së në Korçë ku në dorë kishte dyfekun e mbajtur nga një figurant që luante rolin e komitëve që ruanin Mësonjëtoren, një lloj “Kajoje” i ditëve tona.
Mesazhi i Edi Ramës me dyfek pati efekt tronditës. Kjo, si në komentet e faqes së Facebook të Ramës, por edhe në disa media opozitare.
Koha Jonë, e cila kishte publikuar lajmet e trazirave për të rrëzuar edhe me dhunë qeverinë, e komentoi foton e Ramës me dyfekun e lidhur me gjalmë si një mesazh qartësisht i koduar lufte.
Nikollë Lesi, madje shkroi se Edi Rama po sakrifikon gjithçka, edhe stabilitetin e vendit për të ruajtur pushtetin.
Gjithsesi ngjarjet ndodhën ndryshe dhe Rama veproi përkundrejt parashikimeve duke bërë pakt edhe me Ilir Metën që e dërgoi në presidencë me votat e PS-së, edhe me Lulzim Bashën me të cilin ndau për dy muaj qeverinë e vendit.
Kërkoi timonin vetëm dhe e mori, ndërsa sot politika është në kushte të reja. Kështu që mesazhi i Ilir Metës, nëse ishte i tillë, kërciste dhe dukej paksa si në ajër, megjithëse në media flitet për hetime të thella nga ana e organeve të reja të drejtësisë mbi të gjithë VIP-at e politikës shqiptare.
Spartak Ngjela, nga sulmi ndaj Sali Berishës dhe Ilir Metës, ka futur në tavë edhe Edi Ramën vetë, duke shtuar kështu kakofoninë e diskutimeve që shpesh shkojnë drejt groteskut.
Por gjithsesi, mbajtja e një arme apo publikimi i një arme zjarri nga ana e politikanëve është natyrisht mundësi shumë e madhe për keqkuptim dhe keqintepretim.
Një intepretim i dyzuar për deklarata të ndryshme kanë hedhur benzinë në zjarret e ndezura nga politika, e jo më një instrument që vret e të merr jetën.
Nëse nuk është bërë me qëllim, padyshim që është bërë gabim dhe i rëndë madje.
Ndoshta është kuptuar kjo dhe është fshirë më pas fotoja e Metës me kobure duke e drejtuar diku dhe mirë është bërë.
Por edhe pse u fshi, debati u ndez e ndoshta edhe me dashje u intepretua me tone të ashpra.
Në të shkuarën ka pasur edhe politikanë të tjerë që bënin qitje para publikut, madje edhe një grua si Jozefina Topalli.
Kurse ka ende deputetë që mbajnë kobure në brez dhe herë pas here bëjnë qitje nëpër korije kur shkojnë në “takime me popullin” në ndonjë fshat të thellë.
Madje Saimir Tahiri, kur ishte Ministër i Brendshëm, edhe pse bëntë propagandë për të braktisur dhe dorëzuar armët, në një emision televiziv bëri një “lojë luftash” me armë të mbushura me bojë.
Veprime jo të pjekura natyrisht që kërkojnë reagimin e ashpër të shoqërisë, e cila ndërsa lufton dhunën verbale nëpër panelet e zhurmshme të përnatshme, duket të kundërshtojë ashpër koburet dhe dyfeqet në duart e politikanëve… /tesheshi.com/
