Mesazhi i Ramës me Hoxhë Vokrrin: a ishte një ngacmim për ish-Myftiun e Dibrës së Madhe?

Në fjalimin e Edi Ramës në Peshkopi, aty ku promovoi nisjen e ndërtimit të Rrugës së Arbrit deri në përfundim, ai rezervoi dhe fjalët e një kleriku dibran, Hoxhë Vokrrit. I solli ato pa ndonjë lidhje me çështjen e rrugës. Dhe diferenca ishte e dukshme.

“Duke reflektuar gjatë gjithë procesit, po sjell këtu apelin e një dibrani të madh, Hoxhë Vokrrit, në veprën e tij rilindase “Ferfejsja e muslimanëve”: ‘Para Zotit dhe popullit do të jenë përgjegjës të gjithë ulematë, hoxhallarë dhe intelektualë të kohës, pse në kohën në kohën e tyre ndër shqiptarë ka patur ndarje dhe përçarje’”, ishin fjalët e Ramës, të cilat ngjanin me një mesazh të fshehur.

Por ndaj kujt dhe për çfarë?

Në tribunën e ceremonisë, i pranishëm ka qenë dhe një ndër klerikët aktualë më të njohur të Dibrës, njëherësh me pozita drejtuese politike dhe administrative. Bëhet fjalë për ish-Myftiun e Dibrës së Madhe, sot kryekomunar i këtij qyteti nën siglën e BDI-së, Rruzhdi Lata. Ky i fundit, pos që njihet si mik i kreut demokrat Basha, e shfaq hapur antipatinë e tij, diku politike e diku njerëzore, ndaj Edi Ramës. Mirëpo Lata ishte prezent në aktivitetin me Ramën protagonist, e në fjalën e tij edhe e artikuloi emrin e shefit të qeverisë së Tiranës, kur tha se “i takon kryeministrit Rama që t’jua kthejë mirënjohjen dibranëve”, duke përmendur kontributin e tyre si ndërtues në disa qytete shqiptare e të botës.

E ndër të tjera, ai dha dhe një mesazh ngacmues, kur tha se: “Politikanët e sotëm rrallë e përmendin Rilindjen Kombëtare dhe mendoj se është vendi dhe momenti të kujtoj në mesin tuaj Sami Frashërin e madh, i cili para 150 vitesh ka shkruar veprën ‘Shqipëria çka qenë, ç’është dhe çdo të bëhet’. Çka qenë e kemi lexuar, çka është e përjetojmë, çka do të bëhet, varet prej të gjithëve ne”.

Dhe ka qenë më pas Rama që në fjalën e tij, jo vetëm që ka cituar një rilindas, por ai ka qenë dhe klerik, porsi Lata, Hoxhë Vokrri pra.

Dhe si për ta kompletuar mesazhin, tek fjalët e Hoxhës së njohur, Rama ka patur dhe apelin e moskrijimit të ndasive politike përcjellë për të gjithë ata kanë një pozitë fetare e jo vetëm në shoqëri.

“‘Para Zotit dhe popullit do të jenë përgjegjës të gjithë ulematë, hoxhallarë dhe intelektualë të kohës, pse në kohën në kohën e tyre ndër shqiptarë ka patur ndarje dhe përçarje’”.

Ish-Myftiu dhe kryekomunuari Lata, për koiçidencë është një ndër ta. /tesheshi.com/