Hussam Shabat u vra në një sulm ajror izraelit në qytetin e Gazës, pasi kolegu i tij Mohammed Mansour vdiq disa orë më parë. Hussam Shabat, korrespondenti i Al Jazeera-s Mubasher, është gazetari i 208 i vrarë nga pushtimi izraelit në Gaza që nga fillimi i agresionit.
Pas vdekjes së Hussam Shabat, testamenti i tij u publikua në llogarinë e tij zyrtare në Tëitter.
“Nëse po e lexoni këtë, do të thotë se ushtria okupatore izraelite më vrau, ka shumë të ngjarë të shënjestruar. Kur filloi gjithçka, unë isha 21 vjeç. Isha student, kisha ëndrra, si gjithë të tjerët“, ka shkruar Hussam.
Ai vazhdon duke shkruar se si i kaloi ditët e agresionit në Gaza para vdekjes së tij.
“Për 18 muajt e fundit, unë ia kam kushtuar çdo moment të jetës sime popullit tim. Kam dokumentuar tmerret në Gazën veriore çdo minutë, i vendosur t’i tregoj botës të vërtetën që ata po përpiqen të fshehin. Kam fjetur në tokë, në shkolla dhe çadra – kudo që kam mundur. Çdo ditë ka qenë një betejë për mbijetesë. Kam vuajtur nga uria për muaj të tërë dhe kam rrezikuar gjithçka për të nxjerrë në dritë të vërtetën dhe tani, më në fund, kam gjetur paqen, sepse besoj në Palestinë dhe besoj se kjo tokë është e jona dhe ishte nderi më i madh i jetës sime të vdisja duke e mbrojtur atë dhe duke i shërbyer popullit të saj”.
Së fundi, Hussam u bën thirrje kolegëve të tij gazetarë që të vazhdojnë luftën e tyre gazetareske për të vërtetën rreth Gazës.
“Tani ju lutem… Mos ndaloni së foluri për Gazën! Mos e lini botën të kthejë kokën anash! Vazhdoni të luftoni, vazhdoni të tregoni historinë tonë derisa Palestina të jetë e lirë. Për herë të fundit, Hossam Shabat, nga Gaza veriore.”
Zyra e Qeverisë për Media në Gaza njoftoi se vrasja e Hussam Shabat e çon numrin e gazetarëve të vrarë në sulmet izraelite që nga 7 tetori 2023 në 208. Ajo bëri këtë thirrje pas kësaj ngjarjeje:
“Ne i bëjmë thirrje Izraelit, SHBA-së dhe vendeve si Britania e Madhe, Gjermania dhe Franca, të cilët janë bashkëpunëtorë në krimin e gjenocidit, të marrin përgjegjësinë për këtë krim mizor”.
Ushtria izraelite nisi një fushatë të befasishme ajrore në Gaza duke filluar nga e marta, duke vrarë më shumë se 700 palestinezë, duke plagosur më shumë se 1000 të tjerë, duke shkelur një marrëveshje armëpushimi dhe shkëmbimin e të burgosurve që hyri në fuqi në janar. /tesheshi.com/
