Nga Blendi Gashi
Visar Ymeri i cili dha dorëheqje nga të gjitha pozitat në Vetëvendosje, duke e quajtur si vendimin “më të rëndë në jetën e tij, ka pranuar atë që në opinion është thënë disa herë, se nuk ka mudur ta kryejë punën e tij si kryevetëvendosës pasi nuk ia ka arritur ta kontrollojë, siç thotë masën e pakontrollueshme.
“Unë sot jap dorëheqje në shenjë mospajtimi me këto zhvillime. Por edhe si akt zhgënjimi që këto nuk kam arritur t’i ndalë. Kohëve të fundit kam parë një intensitet të shtuar të shpërfilljes së plotë të pozitës sime si kryetar dhe të organeve drejtuese të Lëvizjes sa herë që këto kanë marrë vendime që nuk kanë qenë në përputhje me vullnetin e një pjese të aktivistëve. Në këto rrethana është e pamundshme të drejtosh. E nëse nuk drejtoj, atëherë nuk ka kuptim që të mbetem kryetar”, thuhet në letrën e gjatë të Ymerit.
E ndër të tjera, Ymeri ka thumbuar edhe Albin Kurtin duke akuzuar përkrahësit e tij për një fushatë të egër linçimesh, siç tha, ndaj tij dhe atyre që besojnë si ai.
“Jemi përballur me një fushatë sistematike të shpifjeve, insinuatave, linçimeve e etiketimeve nga më të ndryshmet. Njerëzit janë quajtur abuzues e bashkëpunëtorë shërbimesh. Njerëzit që e kanë shpërndarë një propagandë të tillë vazhdimisht janë thirrur në emrin e Albinit. Disa herë jemi marrë vesh që këto gjëra të ndalohen, porse kjo nuk ka ndodhur kurrë. Këtë metodë nuk e pëlqej, nuk e mbështesë, sepse kjo e dëmton shumë organizatën tonë: metodën e eliminimit politik. Kjo metodë është e dëmshme sepse është informale. Është e padrejtë sepse bazohet në shpifje e insinuata”, thotë Ymeri.
Rasti tjetër ku Ymeri thumbon Kurtin është edhe kur thotë se aktivistët e Vetëvendosjes i janë besnikë idesë e jo njeriut, kjo pasi Kurti është quajtur “baba i VV-së” nga disa aktivistë të cilët shkruan parullat “Jo baba, po ide” të cilët besohet se i përkasin krahit të ish-sekretarit Dardan Molliqaj i cili është kundër Kurtit e pro Ymerit.
“Lëvizja Vetëvendosje përbëhet prej aktivistëve e anëtarëve që i bashkon koncepti e programi, ideologjia e praktika politike. Ne të gjithë bashkë i jemi besnik idesë, jo njeriut. Instalimi i diktatit është problem në vetvete, por zakonisht nuk është qëllim në vetvete. Nëse mënyrë e të vepruarit politik në Lëvizje është diktati atëherë nuk ka koncept, parime e program, është veç fjala e një individi”, thotë më tej Ymeri në letrën e tij.
Ymeri, në aktin e mesazhin e dorëheqjes së rij, ka rezervuar dhe një porosi se si VV duhet të ec tutje.
“Organizata jonë duhet të jetë organizatë demokratike, e hapur, gjithëpërfshirëse, e qartë konceptualisht e ideologjikisht, me decentralizim të prodhimit intelektual e politik, me udhëheqje të ndershme, me vendimmarrje të hapur, e me vizion të qartë për të ardhmen.Ne duhet ta vazhdojmë rrugën e zhvillimit e të rritjes së organizatës sonë. Por jo secila rrugë na shpie atje”, thotë Ymeri
Ai në letrën e tij ka përmendur edhe organizimin e protestave për ndaljen e “Zajednicës”dhe Demarkacionit si dhe zgjedhjet e mbajtura për çka ka thënë se gëzohet që VV u dyfishua sa ai drejtonte partinë. /tesheshi.com/
